ಸೋಚಿ, ಮೇ 20- ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಉತ್ತಮ ಕ್ರೀಡಾ ಪಟುವೂ ಹೌದು. ಈಜು, ಅಥ್ಲೆಟಿಕ್ಸ್‍ನಲ್ಲಿ ಗಮನಸೆಳೆದಿರುವ ಪುಟಿನ್ ಐಸ್ ಹಾಕಿಯಲ್ಲೂ ಹಿಂದೆ ಬಿದ್ದಿಲ್ಲ. ಸೋಚಿಯಲ್ಲಿ ನಡೆದ ಹಿಮ ಹಾಕಿ ಪಂದ್ಯದಲ್ಲಿ ರಷ್ಯಾ ಅಧ್ಯಕ್ಷರು ಐದು ಗೋಲುಗಳನ್ನು ಬಾರಿಸಿ ಅಚ್ಚರಿ ಮೂಡಿಸಿದರು.
ರಷ್ಯಾದ ಸೋಚಿ ನಗರದ ಬೊಲ್‍ಶೊಯ್ ಐಸ್ ಡೋಮ್ ಕ್ರೀಡಾಂಗಣದಲ್ಲಿ ಏಳನೇ ರಷ್ಯನ್ ನ್ಯಾಷನಲ್ ಅಮೆಚೂರ್ ಐಸ್ ಹಾಕಿ ಪಂದ್ಯಾವಳಿ ನಡೆಯಿತು. ರಷ್ಯಾದ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಈ ಕ್ರೀಡೆಯಲ್ಲಿ ಎಲ್ಲರ ಆಕರ್ಷಣೆಯ ಕೇಂದ್ರ ಬಿಂದುವಾಗಿದ್ದರು.
ಉತ್ತಮ ಈಜು ಪಟು ಮತ್ತು ಅಥ್ಲೀಟ್ ಎಂದೇ ಗುರುತಿಸಿಕೊಂಡಿರುವ ಪುಟಿನ್, ನಿವೃತ್ತ ಹಾಕಿ ಆಟಗಾರರ ನೆರವಿನೊಂದಿಗೆ ಐದು ಗೋಲುಗಳನ್ನು ಬಾರಿಸಿ ಎಲ್ಲರ ಗಮನಸೆಳೆದರು.
ನಿವೃತ್ತರಾಗಿರುವ ರಷ್ಯಾದ ಖ್ಯಾತ ಹಾಕಿ ಆಟಗಾರರು, ರಷ್ಯಾ ಅಧ್ಯಕ್ಷ ಪುಟಿನ್, ರಕ್ಷಣಾ ಸಚಿವ ಸರ್ಗೈ ಶೋಯಿಗು ಹಾಗೂ ಉನ್ನತಾಧಿಕಾರಿಗಳ ಫ್ಲಾಗ್‍ಮನ್ ತಂಡವು 12-7 ಸ್ಕೋರ್‍ಗಳೊಂದಿಗೆ ವಿಜಯಿಯಾಗಿ ಕ್ರುಟೋವ್ ಟ್ರೋಫಿ ಗೆದ್ದುಕೊಂಡಿತು.
ಪುಟಿನ್ ಅವರ ನೇತೃತ್ವದಲ್ಲಿ 2011ರಲ್ಲಿ ಸ್ಥಾಪನೆಯಾದ ದಿ ನೈಟ್ ಹಾಕಿ ಲೀಗ್ ತಂಡವು ರಷ್ಯಾದಲ್ಲಿ ಹಿಮ ಹಾಕಿ ಪಂದ್ಯಕ್ಕೆ ಉತ್ತೇಜನ ನೀಡುತ್ತಿದೆ.
