ಹೊಸದಿಲ್ಲಿ: ಆರು ಸಹವರ್ತಿ ಬ್ಯಾಂಕ್‌ಗಳ ವಿಲೀನದ ನಂತರ ಬೃಹತ್‌ ಬ್ಯಾಂಕ್ ಆಗಿ ಹೊರಹೊಮ್ಮಿರುವ ಸ್ಟೇಟ್ ಬ್ಯಾಂಕ್ ಆಫ್‌ ಇಂಡಿಯಾ(ಎಸ್‌ಬಿಐ), ದೇಶದಲ್ಲಿನ ತನ್ನ 1295 ಶಾಖೆಗಳ ಹೆಸರು ಮತ್ತು ಐಎಫ್‌ಎಸ್‌ಸಿ ಕೋಡ್‌ಗಳನ್ನು ಬದಲಿಸಿದೆ.
ಶಾಖೆಗಳ ಹೊಸ ಕೋಡ್‌ಗಳು ಮತ್ತು ಆ ಶಾಖೆಗಳ ಐಎಫ್‌ಎಸ್‌ಸಿ ಕೋಡ್‌ಗಳನ್ನು ಎಸ್‌ಬಿಐ ತನ್ನ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಿದೆ. ಭಾರತೀಯ ಮಹಿಳಾ ಬ್ಯಾಂಕ್ ಮತ್ತು ಸ್ಟೇಟ್ ಬ್ಯಾಂಕ್ ಆಫ್‌ ಮೈಸೂರು ಸಹಿತ 6 ಸಹವರ್ತಿ ಬ್ಯಾಂಕ್‌ಗಳು 2017ರ ಏಪ್ರಿಲ್‌ 1ರಂದು ಎಸ್‌ಬಿಐನಲ್ಲಿ ವಿಲೀನವಾಗಿದ್ದವು.
ಒಟ್ಟು ಆಸ್ತಿಗೆ ಸಂಬಂಧಿಸಿದಂತೆ ಪ್ರಮುಖ ಜಾಗತಿಕ ಬ್ಯಾಂಕ್‌ಗಳಲ್ಲಿ ಎಸ್‌ಬಿಐ 53ನೇ ರಾರ‍ಯಂಕ್‌ ಹೊಂದಿದೆ. 2018ರ ಜೂನ್‌ 30ರ ಹೊತ್ತಿಗೆ ಬ್ಯಾಂಕ್ ಒಟ್ಟು 33.45 ಲಕ್ಷ ಕೋಟಿ ರೂ. ಆಸ್ತಿಯನ್ನು ಹೊಂದಿದಂತಾಗಿದೆ. ಠೇವಣಿಗಳು, ಗ್ರಾಹಕರ ಸಂಖ್ಯೆ ಸೇರಿದಂತೆ ನಾನಾ ವಿಷಯಗಳಲ್ಲಿ ಎಸ್‌ಬಿಐ ಮುಂಚೂಣಿಯಲ್ಲಿದೆ. ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದ ಹೊತ್ತಿಗೆ ಬ್ಯಾಂಕ್ 22,428 ಶಾಖೆಗಳನ್ನು ಹೊಂದಿದೆ.
ಸಂಬಂಧಿಸಿದ ಶಾಖೆಗಳ ಗ್ರಾಹಕರು ಮತ್ತು ಆ ಶಾಖೆಗಳ ಜತೆ ವ್ಯವಹರಿಸಬೇಕಾದ ಗ್ರಾಹಕರು ಬದಲಾದ ಐಎಫ್‌ಎಸ್‌ಸಿ ಕೋಡ್‌ಗಳನ್ನು ಗಮನಿಸಬೇಕು. ಬ್ಯಾಂಕಿಂಗ್ ವ್ಯವಹಾರಗಳಲ್ಲಿ ಈ ಅಂಶಗಳನ್ನು ಮರೆಯಬಾರದು. ಎಸ್‌ಬಿಐನ ವೆಬ್‌ಸೈಟ್‌ಗೆ ಹೋದರೆ ಪರಿಷ್ಕೃತ ಮಾಹಿತಿ ದೊರೆಯುತ್ತದೆ.
