ಉತ್ತರಕಾಶಿ:ಜು-೨೧: ಯುದ್ಧ ವಿಮಾನವೊಂದು ಪತನಗೊಂಡು ಬರೋಬ್ಬರಿ 50 ವರ್ಷಗಳು ಕಳೆದ ನಂತರ ಈಗ ವಿಮಾನದಲ್ಲಿದ್ದ ಯೋಧನ ಮೃತದೇಹ ಪತ್ತೆಯಾಗಿದೆ.
ಐಎಎಫ್ ನ ಸೇನಾ ವಿಮಾನ 1968ರಲ್ಲಿ ಅಪಘಾತಕ್ಕೀಡಾಗಿತ್ತು. ಇದರಲ್ಲಿ 102 ಸೈನಿಕರಿದ್ದರು.ಈ ಪೈಕಿ, ಒಬ್ಬ ಯೋಧನ ಮೃತದೇಹ 50 ವರ್ಷಗಳ ಬಳಿಕ ಪರ್ವತಾರೋಹಿಗಳಿಗೆ ದೊರೆತಿದೆ.
ಹಿಮಾಚಲ ಪ್ರದೇಶದ ಲಾಹೌಲ್‌ ಕಣಿವೆಯಲ್ಲಿ ಮೃತದೇಹ ದೊರೆತಿದ್ದು, 1968ರಲ್ಲಿ ಸಂಭವಿಸಿದ್ದ ಸೇನಾ ವಿಮಾನ ಅಪಘಾತದಲ್ಲಿ ಈ ಯೋಧ ಮೃತಪಟ್ಟಿದ್ದರು ಎಂದು ತಿಳಿದುಬಂದಿದೆ. ಇದರೊಂದಿಗೆ ಕಳೆದ 50 ವರ್ಷಗಳ ಹಿಂದೆ ಅಪಘಾತಕ್ಕೀಡಾಗಿದ್ದ ಎಎನ್ – 12 ಸೇನಾ ವಿಮಾನದ ಅವಶೇಷ ಸಹ ಪತ್ತೆಯಾಗಿದೆ. ಇದನ್ನು ಚಂಡೀಗಢದಿಂದ ಲೇಹ್‌ಗೆ ತೆರಳುತ್ತಿದ್ದ ಸೇನಾ ವಿಮಾನ ಎನ್ನಲಾಗಿದೆ.
ಜುಲೈ 1 ರಂದು ಚಂದ್ರಭಾಗ-13 ಶಿಖರದಲ್ಲಿ ಸ್ವಚ್ಛತಾ ಕಾರ್ಯ ಕೈಗೊಂಡಿದ್ದ 11 ಪರ್ವತಾರೋಹಿಗಳ ತಂಡ ಇದನ್ನು ಪತ್ತೆ ಹಚ್ಚಿದೆ. ಸಮುದ್ರ ಮಟ್ಟದಿಂದ 6200 ಅಡಿ ಎತ್ತರದ ಢಾಕಾ ಹಿಮರಾಶಿಯಲ್ಲಿ ಈ ಮೃತದೇಹ ಹಾಗೂ ವಿಮಾನದ ಅವಶೇಷ ದೊರೆತಿದೆ.
ನಮಗೆ ಮೊದಲು ಸೇನಾ ವಿಮಾನದ ಕೆಲ ಅವಶೇಷ ದೊರಕಿತು. ನಂತರ, ಈ ಸ್ಥಳದಿಂದ ಕೆಲ ಮೀಟರ್‌ಗಳಷ್ಟು ದೂರದಲ್ಲಿ ನಮ್ಮ ತಂಡದ ಸದಸ್ಯರಿಗೆ ಯೋಧನ ಮೃತದೇಹ ದೊರಕಿದೆ ಎಂದು ಪರ್ವತಾರೋಹಿಗಳ ತಂಡದ ನಾಯಕ ರಾಜೀವ್ ರಾವತ್ ಮಾಹಿತಿ ನೀಡಿದ್ದಾರೆ. ನಂತರ, ಈ ಮೃತದೇಹದ ಫೋಟೋಗಳನ್ನು ತೆಗೆದುಕೊಂಡು ಸೇನಾ ಶಾಲೆಯೊಂದಕ್ಕೆ ಜುಲೈ 16ಕ್ಕೆ ನೀಡಿದೆವು. ಅವರು ತಮ್ಮ ಸಿಬ್ಬಂದಿ ಮೂಲಕ ಈಗ ಪ್ರದೇಶದಲ್ಲಿ ಕಾರ್ಯಾಚರಣೆ ನಡೆಸುತ್ತಿದ್ದಾರೆ ಎಂದು ರಾವತ್ ತಿಳಿಸಿದ್ದಾರೆ.
ಸೋವಿಯತ್ ಯೂನಿಯನ್ ನಿರ್ಮಿಸಿದ್ದ ವಿಮಾನ ಫೆಬ್ರವರಿ 7, 1968ರಿಂದ ನಾಪತ್ತೆಯಾಗಿತ್ತು. ಇದರಲ್ಲಿ 98 ಪ್ರಯಾಣಿಕರು ಹಾಗೂ ನಾಲ್ವರು ಸಿಬ್ಬಂದಿ ಇದ್ದರು. ಅಲ್ಲದೆ, ಲೇಹ್‌ನಲ್ಲಿ ವಿಮಾನ ಹವಾಮಾನ ವೈಪರೀತ್ಯ ಇದೆಯೆಂದು ಅಲ್ಲಿಗೆ ತೆರಳಬೇಕಿದ್ದ ವಿಮಾನ, ಮತ್ತೆ ವಾಪಸ್ ಹೋಗುವ ವೇಳೆ ಈ ಅವಘಡ ಸಂಭವಿಸಿತ್ತು ಎನ್ನಲಾಗಿತ್ತು. ರೋಹ್ಟಂಗ್ ಪಾಸ್‌ನಿಂದ ಮುಂದೆ ಹೋದ ಬಳಿಕ ಎಎನ್ – 12 ಸೇನಾ ವಿಮಾನ ರೇಡಿಯೋ ಸಂಪರ್ಕ ಕಳೆದುಕೊಂಡಿತ್ತು.
ಇನ್ನು, ಅಪಘಾತ ನಡೆದು 35 ವರ್ಷಗಳ ಬಳಿಕ ಅಂದರೆ, 2003ರಲ್ಲೂ ವಿಮಾನದ ಅವಶೇಷ ಪತ್ತೆಯಾಗಿತ್ತು. ಮನಾಲಿಯ ಪರ್ವತಾರೋಹಿ ಹಾಗೂ ಇತರ ಕ್ರೀಡಾ ಸಂಸ್ಥೆ ಶಿಖರದಲ್ಲಿ ಇದನ್ನು ಪತ್ತೆ ಹಚ್ಚಿತ್ತು. ಜತೆಗೆ, ಒಂದು ಮೃತದೇಹವನ್ನೂ ಪತ್ತೆಹಚ್ಚಿದ್ದ ತಂಡ, ಇದನ್ನು ಸೇನಾ ಸಿಬ್ಬಂದಿ ಬೆಲಿ ರಾಮ್ ಎಂದು ಗುರುತಿಸಲಾಗಿತ್ತು.
ಚಂಡೀಗಢದಲ್ಲಿ ರೇಡಿಯೋ ಸಂಪರ್ಕ ಮಾಡಿದ್ದ ಆ ವಿಮಾನದ ಪೈಲಟ್, ಅಲ್ಲಿಂದ ವಾಪಸ್ ಬರುವುದಾಗಿ ಮಾಹಿತಿ ನೀಡಿದ್ದರು. ಆದರೆ, ಅದಾದ ಕೇವಲ 3 ನಿಮಿಷದಲ್ಲಿ ಹಿಮಾಲಯದ ಪರ್ವತ ಶ್ರೇಣಿಯ ನಡುವೆ ನಾಪತ್ತೆಯಾಗಿತ್ತು. ನಂತರ, ಆಗಸ್ಟ್ 2007ರಲ್ಲಿ ಭಾರತೀಯ ಸೇನೆಯವರು ಆಪರೇಷನ್ ಪುನರುಥನ್ – III ನಡೆಸಿದ ವೇಳೆ ಇದೇ ಪ್ರದೇಶದಲ್ಲಿ ಮತ್ತೆ ಮೂರು ಮೃತದೇಹಗಳು ದೊರೆತಿತ್ತು. ಒಟ್ಟಾರೆ, 2003 ರಿಂದ 2017ರವರೆಗೆ 5 ಮೃತದೇಹಗಳು ಮಾತ್ರ ದೊರೆತಿದ್ದು, ಇನ್ನೂ ಹಲವು ಮೃತದೇಹಗಳು ಇದೇ ಪ್ರದೇಶದಲ್ಲಿರಬಹುದು ಎಂದು ಶಂಕಿಸಲಾಗಿದೆ.
Climbers find body of soldier killed in 1968 plane crash on Himachal glacier
