ಬೆಂಗಳೂರು, ಮೇ 17- ವಿಧಾನಸಭೆಗೆ ಚುನಾವಣೆ ಘೋಷಣೆಯಾದ ನಂತರ ಜನಜಂಗುಳಿಯಿಲ್ಲದೆ ಬಿಕೋ ಎನ್ನುತ್ತಿದ್ದ ವಿಧಾನಸೌಧ-ವಿಕಾಸಸೌಧ ಇಂದು ಕಳೆಗಟ್ಟಿದೆ.
ಮುಖ್ಯಮಂತ್ರಿಯಾಗಿ ಬಿ.ಎಸ್.ಯಡಿಯೂರಪ್ಪ ಪ್ರಮಾಣ ವಚನ ಸ್ವೀಕರಿಸಿ ವಿಧಾನಸೌಧಕ್ಕೆ ಆಗಮಿಸುತ್ತಿದ್ದಂತೆ ಎಲ್ಲೆಲ್ಲೂ ಮಿಂಚಿನ ಸಂಚಾರ ಕಂಡುಬಂದಿತು.
ಅಧಿಕಾರಿಗಳು, ರಾಜಕಾರಣಿಗಳು, ಬಿಜೆಪಿ ಕಾರ್ಯಕರ್ತರು, ಮುಖಂಡರು ಬೆಳಗಿನಿಂದ ಆಗಮಿಸುತ್ತಲೇ ಇದ್ದು, ಈ ಎರಡೂ ಶಕ್ತಿಸೌಧಗಳಿಗೆ ಮತ್ತೆ ಹೊಸ ಕಳೆ ಬಂದಿದೆ.
ಇತ್ತ ಯಡಿಯೂರಪ್ಪ ಅಧಿಕಾರಿಗಳೊಂದಿಗೆ ಸಭೆ ನಡೆಸುತ್ತಿದ್ದರೆ, ಅತ್ತ ವಿಧಾನಸೌಧ-ವಿಕಾಸಸೌಧಗಳ ನಡುವೆ ಇರುವ ಗಾಂಧಿ ಪ್ರತಿಮೆ ಬಳಿ ಕಾಂಗ್ರೆಸ್, ಜೆಡಿಎಸ್ ಶಾಸಕರು ರಾಜ್ಯಪಾಲರ ನಡೆಯನ್ನು ಖಂಡಿಸಿ ಪ್ರತಿಭಟನೆ ನಡೆಸುತ್ತಿದ್ದರು.
ಎರಡೂ ಸೌಧಗಳ ಕಚೇರಿಗಳಲ್ಲಿ ಅಧಿಕಾರಿಗಳ ಚುರುಕಿನ ಓಡಾಟ ಕಂಡುಬಂದಿತು. ಇದುವರೆಗೆ ಬಿಕೋ ಎನ್ನುತ್ತಿದ್ದ ವಿಧಾನಸೌಧ ಇಂದು ಯಥಾಸ್ಥಿತಿಗೆ ಮರಳಿದೆ.
