ನಂಜನಗೂಡು, ಮೇ 2- ನಂಜನಗೂಡು ವಿಧಾನಸಭಾ ಕ್ಷೇತ್ರದಲ್ಲಿ ತ್ರಿಕೋನ ಸ್ಪರ್ಧೆ ಇರುವುದರಿಂದ ಬಿಜೆಪಿ ಪಕ್ಷಕ್ಕೆ ಗೆಲುವು ಉಂಟಾಗಲಿದೆ ಎಂದು ಬಿಜೆಪಿ ಅಭ್ಯರ್ಥಿ ಹರ್ಷವರ್ಧನ್ ಸುದ್ದಿಗಾರರಿಗೆ ತಿಳಿಸಿದ್ದಾರೆ. ಮುನಿಸಿಕೊಂಡಿದ್ದ ನಗರಸಭಾ ಸದಸ್ಯ ಹೆಚ್.ಎಸ್.ಮಹದೇವಸ್ವಾಮಿ ಅವರ ಮನೆಗೆ ಭೇಟಿ ನೀಡಿ ಮನವೊಲಿಸಿ ಪಕ್ಷದಲ್ಲಿ ಸಕ್ರಿಯವಾಗಿ ಪಾಲ್ಗೊಂಡು ಪಕ್ಷದ ಗೆಲುವಿಗೆ ಸಹಕರಿಸಬೇಕೆಂದು ಕೋರಿದರು.
ಈ ಸಂದರ್ಭದಲ್ಲಿ ಪ್ರತಿಕ್ರಿಯೆ ನೀಡಿದ ಮಹದೇವಸ್ವಾಮಿ, ಟಿಕೆಟ್ ವಿಚಾರದಲ್ಲಿ ಸ್ವಲ್ಪ ಗೊಂದಲವಿದ್ದು, ಈಗ ಅದೆಲ್ಲ ಬಗೆ ಹರಿದಿದೆ. ಕ್ಷೇತ್ರಾದ್ಯಾಂತ ಬಿಜೆಪಿಯ ಅಲೆ ಇರುವುದರಿಂದ ಎಲ್ಲ ಮುಖಂಡರು, ಕಾರ್ಯಕರ್ತರು ಹುಮ್ಮಸ್ಸಿನಿಂದ ಪ್ರಚಾರದಲ್ಲಿ ತೊಡಗಿದ್ದು, ನಾವು ಪ್ರಚಾರಕ್ಕೆ ಹೋದಡೆಯೆಲ್ಲ ಉತ್ತಮ ಅಭಿಪ್ರಾಯ ಉಂಟಾಗಿದೆ.
ಮೇ 5ರ ಶನಿವಾರದಿಂದ ನಂಜನಗೂಡು ನಗರದಲ್ಲಿ ಮನೆ ಮನೆಗೆ ಭೇಟಿನೀಡಿ ಮತಯಾಚನೆ ಮಾಡಲಾಗುವುದು. ನಂತರ ಬೃಹತ್ ಬಹಿರಂಗ ಸಭೆ ಹಮ್ಮಿಕೊಳ್ಳಲಾಗಿದೆ. ಮಾಜಿ ಸಚಿವ ವಿ.ಶ್ರೀನಿವಾಸ್ ಪ್ರಸಾದ್, ಬಿ.ಎಸ್.ಯಡಿಯೂರಪ್ಪನವರ ಪುತ್ರ ವಿಜಯೇಂದ್ರ ಸೇರಿದಂತೆ ಬಿಜೆಪಿಯ ವರಿಷ್ಠರು ಭಾಗವಹಿಸಲಿದ್ದಾರೆ ಎಂದರು.
ತಾಲ್ಲೂಕು ಮಾಜಿ ಅಧ್ಯಕ್ಷ ಡಾ.ಚಿದಾನಂದ, ಶಿವಕುಮಾರ್, ನಗರಸಭಾ ಸದಸ್ಯರಾದ ಗಿರೀಶ್ ಕುಮಾರ್, ಸುಧಾ ಮಹೇಶ್ ಕುಮಾರ್, ಎಸ್ಟಿ ಮೋರ್ಚಾ ಅಧ್ಯಕ್ಷ ಶ್ರೀಕಂಠು, ಷಣ್ಮುಗ, ಚೇ. ಹಂಡುವಿನಹಳ್ಳಿ ನಾಗಪ್ಪ, ಶಿವನಾಗಪ್ಪ, ಅಶೋಕಪುರಂ ಮಧು, ಸಂತೋಷ, ಸಿದ್ದರಾಜು, ಚಿಕ್ಕಾಟಿ ಮಹದೇವಪ್ಪ, ಲಾರಿ ಗಿರೀಶ್, ಮಾದನಹಳ್ಳಿ ನಂಜುಂಡಸ್ವಾಮಿ ಸೇರಿದಂತೆ ಹಲವಾರು ಪ್ರಮುಖರು ಭಾಗವಹಿಸಿದ್ದರು.
