ಚೆನ್ನೈ:`ಜೈ ಶ್ರೀ ರಾಮ್’ ಎಂಬ ಹೆಸರಿನ 4.1 ಅಡಿ ಎತ್ತರದ ಬೃಹತ್ ಘಂಟೆಯೊಂದನ್ನು ಅಯೋಧ್ಯೆಯ ಪ್ರಸ್ತಾವಿತ ಶ್ರೀ ರಾಮ ಮಂದಿರಕ್ಕೆ ಅರ್ಪಿಸಲಾಗಿದೆ.
ಚೆನ್ನೈ ಮೂಲದ ಕಾನೂನು ಹಕ್ಕುಗಳ ಮಂಡಳಿಯು ಆಯೋಜಿಸಿದ್ದ ರಾಮ್ ರಥಯಾತ್ರೆ ಮೂಲಕ ಈ ಘಂಟೆಯನ್ನು ಅ.7ಕ್ಕೆ ಅಯೋಧ್ಯೆಗೆ ಒಯ್ದು ಸಮರ್ಪಿಸಲಾಯಿತು. ಸೆ.17ರಂದು ರಾಮೇಶ್ವರಂನಿಂದ ಪ್ರಾರಂಭವಾದ ಈ ಯಾತ್ರೆಯು ಅ.7ಕ್ಕೆ ಅಯೋಧ್ಯೆಯನ್ನು ತಲುಪಿತು.
ಈ ಘಂಟೆಯು ಅತ್ಯಂತ ವಿಶಿಷ್ಟವಾಗಿದ್ದು, ಇದು 613 ಕಿ.ಗ್ರಾಂ. ಭಾರ , 4.1 ಅಡಿ ಎತ್ತರ ಮತ್ತು 3.9 ಅಡಿ ಅಗಲವಿದೆ. ಈ ಘಂಟೆ ಬಾರಿಸಿದರೆ ಅದರ ಶಬ್ದವನ್ನು 8 ಕಿ.ಮೀ ದೂರದವರೆಗೂ ಕೇಳಬಹುದು. ಈ ಘಂಟೆಯನ್ನು ನೀಡಲು ನಾವು 11 ರಾಜ್ಯಗಳನ್ನು ದಾಟಿ ಅಯೋಧ್ಯೆಯನ್ನು ತಲುಪಲು 4,555 ಕಿ.ಮೀ .ದೂರವನ್ನು ಕ್ರಮಿಸಿರುವುದಾಗಿ ಕಾನೂನು ಹಕ್ಕುಗಳ ಮಂಡಳಿಯ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ರಾಜಲಕ್ಷ್ಮಿ ಮಂಡ ಅವರು ಮಾಹಿತಿ ನೀಡಿದರು.
