ಲಂಡನ್, ಡಿ.13-ಬ್ರಿಟನ್ ಸಾರ್ವತ್ರಿಕ ಚುನಾವಣೆಯಲ್ಲಿ ಬೋರಿಸ್ ಜಾನ್ಸನ್ ಪ್ರಧಾನಮಂತ್ರಿಯಾಗಿ ಪುನರಾಯ್ಕೆಯಾಗುವುದು ಖಚಿತವಾಗಿದೆ ಎಂದು ಚುನಾವಣೋತ್ತರ ಸಮೀಕ್ಷೆಯೊಂದು ಹೇಳಿದೆ.
ಈ ಜಯಭೇರಿಯೊಂದಿಗೆ ಬ್ರೆಕ್ಸಿಟ್(ಬ್ರಿಟನ್ ಎಗ್ಸಿಟ್-ಐರೋಪ್ಯ ಒಕ್ಕೂಟದಿಂದ ಬ್ರಿಟನ್ ಹೊರಬರುವಿಕೆ) ವಿಷಯದಲ್ಲಿ ಇಂಗ್ಲೆಂಡ್‍ನಲ್ಲಿ ತಲೆದೋರಿದ್ದ ಅನಿಶ್ಚಿತತೆ ಕೊನೆಗೊಳ್ಳಲಿದೆ. ಅಲ್ಲದೇ ಮುಂದಿನ ತಿಂಗಳು ಯುರೋಪ್ ಸಮುದಾಯದಿಂದ ಯುನೈಟೆಡ್ ಕಿಂಗ್‍ಡಂನನ್ನು ಪ್ರತ್ಯೇಕಗೊಳಿಸಲು ಬೋರಿಸ್ ಜಾನ್ಸನ್‍ಗೆ ಸಹಕಾರಿಯಾಗಲಿದೆ.
ಬಿಬಿಸಿ/ಟಟಿವಿ/ಸ್ಕೈ ಎಗ್ಸಿಟ್ ಪೋಲ್ ಸಮೀಕ್ಷೆ ಪ್ರಕಾರ ಜಾನ್ಸನ್ ನೇತೃತ್ವದ ಕನ್ಸರ್‍ವೇಟಿವ್ ಪಾರ್ಟಿ, ಲೇಬರ್ ಪಕ್ಷದ ವಿರುದ್ಧ ಭಾರೀ ಅಂತರದಿಂದ ಮೇಲುಗೈ ಸಾಧಿಸಿದೆ. 2016ರ ಜನಾದೇಶದಲ್ಲಿ ಉತ್ತರ ಇಂಗ್ಲೆಂಡ್ ಮತ್ತು ವೇಲ್ಸ್‍ನಲ್ಲಿ ಹಿಡಿತ ಸಾಧಿಸಿದ್ದ ಲೇಬರ್ ಪಾರ್ಟಿಗೆ ಈ ಸಾರ್ವತ್ರಿಕ ಚುನಾವಣೆಯಲ್ಲಿ ಭಾರೀ ಮುಖಭಂಗವಾಗಿದೆ.
ತಮ್ಮ ಗೆಲುವಿನ ಬಗ್ಗೆ ಪ್ರತಿಕ್ರಿಯಿಸಿರುವ ಪ್ರಧಾನಿ, ಗ್ರೇಟ್ ಬ್ರಿಟನ್ ಜನತೆಗೆ ಅಭಿನಂದನೆ ಸಲ್ಲಿಸಿದ್ದಾರೆ. ಬ್ರೆಕ್ಸಿಟ್ ಜಾರಿಗೆ ಇದು ಮತದಾರರು ನೀಡಿದ ಪ್ರಬಲ ಹೊಸ ಜನಾದೇಶ ಎಂದು ಬಣ್ಣಿಸಿದ್ದಾರೆ.
