ವಾಷಿಂಗ್ಟನ್ : ಮಧ್ಯಮ ಗಾತ್ರದ ಎರಡು ಕ್ಷುದ್ರಗ್ರಹಗಳು ಭೂಮಿಯತ್ತ ಧಾವಿಸಿ ಬರುತ್ತಿವೆ. ಭಾರತದ ಕಾಲಮಾನದಲ್ಲಿ ಹೇಳುವುದಾದರೆ ಶನಿವಾರ ಬೆಳಗ್ಗೆ 9.12ಕ್ಕೆ ಈ ಅವಳಿ ಕ್ಷುದ್ರಗ್ರಹಗಳು ಭೂಮಿಯ ಸಮೀಪಕ್ಕೆ ಬರಲಿವೆ. ಐರೋಪ್ಯ ದೇಶಗಳ ಕಾಲಮಾನದ ಪ್ರಕಾರ ಶುಕ್ರವಾರ ಮಧ್ಯರಾತ್ರಿ 11.42ಕ್ಕೆ ಈ ಎರಡೂ ಕ್ಷುದ್ರಗ್ರಹಗಳು ಭೂಮಿಯ ಸನಿಹಕ್ಕೆ ಬರಲಿವೆ.
ಸೆಪ್ಟಂಬರ್ 13ನೇ ಶುಕ್ರವಾರ, ಪಾಶ್ಚಿಮಾತ್ಯ ದೇಶಗಳ ನಂಬಿಕೆ ಪ್ರಕಾರ ಅಪಶಕುನದ ದಿನ. ಸೆಪ್ಟಂಬರ್ ಮಾತ್ರವಲ್ಲ, ಯಾವುದೇ ತಿಂಗಳಲ್ಲಿ 13ನೇ ತಾರೀಖು ಶುಕ್ರವಾರ ಬಂದ್ರೆ ಅದನ್ನು ‘ಅಪಶಕುನ’ಎಂದು ಪಾಶ್ಚಿಮಾತ್ಯರು ಭಾವಿಸುತ್ತಾರೆ. ಹೀಗಾಗಿ, ಅದೇ ದಿನ ಮಧ್ಯರಾತ್ರಿ ಅವಳಿ ಕ್ಷುದ್ರಗ್ರಹಗಳು ಭೂಮಿಯ ಸನಿಹಕ್ಕೆ ಧಾವಿಸುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ.
ನಾಸಾ ಅಧಿಕೃತ ಪ್ರಕಟಣೆ ಪ್ರಕಾರ, ಈ ಎರಡೂ ಕ್ಷುದ್ರಗ್ರಹಗಳು, ಭೂಮಿಯ ಸಮೀಪಕ್ಕೆ ಬಂದು ಸುರಕ್ಷಿತವಾಗಿ ಭೂಮಿಯನ್ನು ಹಾದು ಹೋಗಲಿವೆ. ಭೂಮಿಗೆ ಅಪ್ಪಳಿಸುವ ಯಾವುದೇ ಸಾಧ್ಯತೆ ಇಲ್ಲ ಎಂದು ನಾಸಾ ಲೆಕ್ಕಾಚಾರ ಹಾಕಿ ಹೇಳಿದೆ. 2000ನೇ ಇಸ್ವಿಯಿಂದ 2010ರವರೆಗೂ ಈ ಎರಡೂ ಕ್ಷುದ್ರಗ್ರಹಗಳ ಕಕ್ಷೆ ಮೇಲೆ ನಾಸಾ ನಿಗಾ ಇಟ್ಟಿದೆ. ಹೀಗಾಗಿ, ಈ ಅವಳಿ ಕ್ಷುದ್ರಗ್ರಹದಿಂದ ಭೂಮಿಗೆ ಯಾವುದೇ ತೊಂದರೆ ಇಲ್ಲ ಎಂದು ನಾಸಾ ಹೇಳಿದೆ.
ಭೂಮಿಯಿಂದ 3.5 ದಶಲಕ್ಷ ಮೈಲು ದೂರದಲ್ಲಿ ಈ ಅವಳಿ ಕ್ಷುದ್ರಗ್ರಹಗಳು ಹಾದುಹೋಗುವುದರಿಂದಾಗಿ, ಭೂಮಿಯ ಗುರುತ್ವಾಕರ್ಷಣೆಗೆ ಸಿಲುಕುವ ಸಂಭವ ಇಲ್ಲ ಎಂದು ನಾಸಾ ಹೇಳಿದೆ. ಆದ್ರೆ, ಕೆಲವು ಸಣ್ಣಪುಟ್ಟ ಕ್ಷುದ್ರಗ್ರಹಗಳು ಭೂಮಿಯ ಸಮೀಪಕ್ಕೆ ಬರುತ್ತವೆ, ಇವುಗಳಿಂದ ಯಾವುದೇ ತೊಂದರೆಯಿಲ್ಲ ಎಂದು ನಾಸಾ ಹೇಳಿದೆ.
ಇದೀಗ ಭೂಮಿಯ ಬಳಿಗೆ ಬರುತ್ತಿರುವ ಮಧ್ಯಮ ಗಾತ್ರದ ಅವಳಿ ಕ್ಷುದ್ರಗ್ರಹಗಳು 400 ರಿಂದ 850 ಅಡಿ ಗಾತ್ರ ಹೊಂದಿವೆ. ಸೂರ್ಯನನ್ನು ಸುತ್ತುವ ಈ ಕ್ಷುದ್ರಗ್ರಹಗಳು ಆಗಾಗ ಭೂಮಿಯ ಬಳಿ ಬರುತ್ತವೆ, ಆದ್ರೆ 300 ದಶಲಕ್ಷ ಮೈಲುಗಳಷ್ಟು ದೂರದಲ್ಲೇ ಇರುತ್ತವೆ ಎಂದು ನಾಸಾ ವಿವರಿಸಿದೆ.
ಸೌರಮಂಡಲ ರಚನೆ ವೇಳೆಯಲ್ಲಿ ಗ್ರಹಗಳ ರಚನೆಯಾದ ಬಳಿಕ, ಒಂದಷ್ಟು ವಸ್ತುಗಳು ಸೌರಮಂಡಲದಲ್ಲಿ ಚೆಲ್ಲಾಪಿಲ್ಲಿಯಾಗಿ ಹರಡಿಕೊಂಡಿವೆ. 4.6 ದಶಕೋಟಿ ವರ್ಷಗಳ ಹಿಂದೆ ರಚನೆಯಾದ ಈ ಕ್ಷುದ್ರಗ್ರಹಗಳು, ಇಂದಿಗೂ ಸೂರ್ಯನನ್ನು ಸುತ್ತಿತ್ತಿವೆ. ಶಿಲೆಗಳಿಂದ ನಿರ್ಮಿತವಾದ ಕ್ಷುದ್ರಗ್ರಹಗಳು ಮಂಗಳ ಹಾಗೂ ಗುರು ಗ್ರಹದ ನಡುವೆ ಅಲೆದಾಡುತ್ತಿವೆ.
