ನವದೆಹಲಿ: ಅತ್ಯಾಧುನಿಕ ಎಫ್-16 ಅನ್ನು ಹೊಡೆದುರುಳಿಸಿದ ಮೊದಲ ಯುದ್ಧ ಪೈಲಟ್ ಅಭಿನಂದನ್ ವರ್ಧಮಾನ್ ಎಂದು ವಾಯುಪಡೆಯ ನಿವೃತ್ತ ಏರ್ ಚೀಫ್ ಮಾರ್ಷಲ್ ಕೃಷ್ಣಸ್ವಾಮಿ ಅಭಿಪ್ರಾಯಪಟ್ಟಿದ್ದಾರೆ.
ಭಾರತದ ಮಿಗ್ 21 ಯುದ್ಧ ವಿಮಾನ ಅತ್ಯಾಧುನಿಕವಾದರೂ, ಅಮೆರಿಕ ನಿರ್ಮಿತ ಎಫ್-16ಗೆ ಸರಿಸಾಟಿಯಲ್ಲ. ಆದರೂ, ಮಿಗ್ ಯುದ್ಧ ವಿಮಾನ ಚಲಾಯಿಸುತ್ತಿದ್ದ ಭಾರತೀಯ ವಿಂಗ್ ಕಮಾಂಡರ್ ಅಭಿನಂದನ್ ಪಾಕಿಸ್ತಾನದ ಎಫ್-16 ಅನ್ನು ಹೊಡೆದುರುಳಿಸಿದ್ದಾರೆ. ಅವರು ಎಫ್16 ಹೊಡೆದು ಹಾಕಿದ ಮೊದಲ ಪೈಲಟ್ ಎಂದು ಅವರು ಹೇಳಿದ್ದಾರೆ.
ಸಾಹಸ ಮೆರೆದಿರುವ ಅಭಿನಂದನ್ ಅವರು ಅತೀ ಶೀಘ್ರದಲ್ಲೇ ಯುದ್ಧ ವಿಮಾನದ ಕಾಕ್ಪಿಟ್ಗೆ ಮರಳಲಿ (ವಾಯುಸೇನೆಯ ಸೇವೆಗೆ ಮರಳಲಿ) ಎಂದು ಕೃಷ್ಣ ಸ್ವಾಮಿ ಆಶಿಸಿದ್ದಾರೆ.
ಎಫ್-16 ಯುದ್ಧ ವಿಮಾನ ಅಮೆರಿಕ ನಿರ್ಮಿತ ಯುದ್ಧವಿಮಾನವಾಗಿದೆ. ಭಯೋತ್ಪಾದನಾ ನಿಗ್ರಹ ಕಾರ್ಯಾಚರಣೆಗಾಗಿ ಅಮೆರಿಕವು ಪಾಕಿಸ್ತಾನಕ್ಕೆ ಹಲವು ಎಫ್-16 ವಿಮಾನಗಳನ್ನು ಮಾರಾಟ ಮಾಡಿದೆ.
ಭಾರತೀಯ ವಾಯು ಗಡಿ ದಾಟಿ ಬಂದ ಪಾಕಿಸ್ತಾನದ ಎಫ್-16 ಯುದ್ಧ ವಿಮಾನಗಳನ್ನು ಬೆನ್ನಟ್ಟಿ ಹೋಗಿದ್ದ ಭಾರತೀಯ ಮಿಗ್ 21 ವಿಮಾನವನ್ನು ವಿಂಗ್ ಕಮಾಂಡರ್ ಅಭಿನಂದನ್ ಚಲಾಯಿಸುತ್ತಿದ್ದರು. ಎಫ್-16 ಜತೆಗೆ ಕಾಳಗ ನಡೆಸಿದ್ದ ವೇಳೆ ಪಾಕ್ ವಿಮಾನವನ್ನು ಹೊಡೆದುರುಳಿಸಿದ್ದರು ಆದರೆ ಇದೇ ವೇಳೆ ಅಭಿನಂದನ್ ಇದ್ದ ವಿಮಾನೂ ಪತನವಾಗಿತ್ತು. ನಂತರ ಪ್ಯಾರಾಚೂಟ್ ಮೂಲಕ ಪಾಕಿಸ್ತಾನದ ನೆಲಕ್ಕೆ ಧುಮುಕಿದ್ದ ಅವರನ್ನು ಅಲ್ಲಿನ ಸೇನೆ ಬಂಧಿಸಿತ್ತು. ಕಳೆದ ಶುಕ್ರವಾರ ರಾತ್ರಿ ಪಾಕಿಸ್ತಾನ ಅವರನ್ನು ಭಾರತಕ್ಕೆ ಹಸ್ತಾಂತರ ಮಾಡಿತ್ತು.
