ಬೆಂಗಳೂರು, ಸೆ.4- ಹಾಸ್ಯ ಕಲಾವಿದ ಗಂಗಾವತಿ ಪ್ರಾಣೇಶ್ ಅವರ ಸ್ವ ವಿವರ ಹಾಗೂ ಕಾರ್ಯಕ್ರಮಗಳ ಮಾಹಿತಿ ಒಳಗೊಂಡ ವೆಬ್‍ಸೈಟ್‍ಅನ್ನು ಇಂದು ಸಂಜೆ ಸಾಹಿತ್ಯ ಪ್ರೇಮಿಗಳ ಬಳಗವು ಲೋಕಾರ್ಪಣೆಗೊಳಿಸಲಿದೆ.
ಈ ಬಗ್ಗೆ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಹಾಸ್ಯ ಚಕ್ರವರ್ತಿ ಗಂಗಾವತಿ ಪ್ರಾಣೇಶ್, ನನ್ನ ಬದುಕಿನ ಸಿಹಿ-ಕಹಿ ಅನುಭವಗಳು, ನಾನು ಬೆಳೆದು ಬಂದ ದಾರಿ, ಬಾಲ್ಯದ ಅನುಭವಗಳು, ನನ್ನ ಬದುಕಿನ ಅಪರೂಪದ ಘಟನೆಗಳು ಇತ್ಯಾದಿಗಳನ್ನು ಜನರೊಂದಿಗೆ ಹಂಚಿಕೊಳ್ಳುವ ಉದ್ದೇಶದಿಂದ ಈ ವೆಬ್‍ಸೈಟ್ ಸಿದ್ಧಪಡಿಸಲಾಗಿದೆ ಎಂದು ಹೇಳಿದರು.
1987 ರಿಂದ 2000ದ ನಡುವೆ ನಡೆದಿರುವ ಕಾರ್ಯಕ್ರಮಗಳ ವಿವರ, ಅಪರೂಪದ ವಿಡಿಯೋಗಳನ್ನು ಈ ವೆಬ್‍ಸೈಟ್‍ನಲ್ಲಿ ಹಂಚಿಕೊಳ್ಳಲಿದ್ದೇನೆ. ಜತೆಗೆ ಒಂದು ತಿಂಗಳು ಮುನ್ನವೇ ನಾನು ನಡೆಸುವ ಹಾಸ್ಯ ಕಾರ್ಯಕ್ರಮಗಳ ಸ್ಥಳ, ದಿನಾಂಕ ಹಾಗೂ ಯಾರನ್ನು ಸಂಪರ್ಕಿಸಬೇಕು ಎಂಬ ಮಾಹಿತಿ ಸಿಗಲಿದೆ ಎಂದರು.
ಬೇರೆಯವರು ನನ್ನ ಕಾರ್ಯಕ್ರಮಗಳ ವಿಡಿಯೋಗಳನ್ನು ದುರುಪಯೋಗ ಮಾಡಿಕೊಳ್ಳಬಾರದು ಎಂಬುದು ಇದರ ಉದ್ದೇಶವಾಗಿದೆ ಎಂದು ತಿಳಿಸಿದರು.
