ಅರ್ಜಿಂಟೀನಾ:ಆ-13: ವಿಶ್ವಾದ್ಯಂತ ಆತಂಕಕ್ಕೀಡು ಮಾಡಿದ್ದ ಅಪಾಯಕಾರಿ ಬ್ಲ್ಯೂ ವೇಲ್ ಚಾಲೆಂಜ್ ಭೀತಿಯಿಂದ ಹೊರ ಬಂದ ಬಳಿಕ ಈಗ ಅಂತದ್ದೇ ಮತ್ತೊಂದು ಭಯಾನಕ ಚಾಲೆಂಜಿಂಗ್ ಗೇಮ್ ಸಾಮಾಜಿಕ ಜಾಲತಾಣಗಳಲ್ಲಿ ತಲೆ ಎತ್ತಿದೆ. ಅದೇ ‘ಮೊಮೊ ಚಾಲೆಂಜ್’.
ಮೊಮೊ ಚಾಲೆಂಜ್ ಮೊದಲು ಆರಂಭವಾಗಿದ್ದು ಫೇಸ್ಬುಕ್ನಲ್ಲಿ. ನಂತರ ವಾಟ್ಸ್ ಆ್ಯಪ್ಗೂ ತನ್ನ ಪರಿಮಿತಿ ವಿಸ್ತರಿಸಿಕೊಂಡಿದೆ. ಈ ಮೊಮೊ ಚಾಲೆಂಜ್ ಸ್ವೀಕರಿಸುವಂತೆ ಅನಾಮಿಕ ಮೊಬೈಲ್ ಸಂಖ್ಯೆಯಿಂದ ಮೆಸೇಜ್ ಬರುತ್ತದೆ. ಆ ಸಂಖ್ಯೆಯ ಬಳಕೆದಾರರಿಗೆ ಮೊಮೊ ನೀಡುವ ಚಾಲೆಂಜ್ ಪೂರ್ಣಗೊಳಿಸುವಂತೆ ಒತ್ತಾಯಿಸಲಾಗುತ್ತಿದೆ. ಒಂದು ವೇಳೆ ಈ ಚಾಲೆಂಜ್ ತೆಗೆದುಕೊಂಡ ಬಳಿಕ ಹಂತಹಂತವಾಗಿ ಚಾಲೆಂಜ್ಗಳನ್ನು ನೀಡುತ್ತಾ ನಂತರ ಹಿಂಸಾತ್ಮಕ ಕೃತ್ಯಗಳನ್ನು ಮಾಡಿ ಚಿತ್ರೀಕರಿಸಿ ನಮಗೆ ಕಳುಹಿಸುವಂತೆ ಸೂಚಿಸಲಾಗುತ್ತದೆ. ಹೀಗೆ ಹಿಂಸಾತ್ಮಕ ಕೃತ್ಯಗಳಿಗೆ ಪ್ರೇರೇಪಿಸುತ್ತಾ ಕೊನೆ ಹಂತದಲ್ಲಿ ಆತ್ಮಹತ್ಯೆ ಮಾಡಿಕೊಳ್ಳುವಂಥ ಅಪಾಯಕಾರಿ ಚಾಲೆಂಜ್ ನೀಡಿ ಮೊಮೊ ಚಾಲೆಂಜ್ ಮುಗಿಸುವಂತೆ ಆದೇಶಿಸಲಾಗುತ್ತದೆ.
ಒಂದು ವೇಳೆ ಚಾಲೆಂಜ್ ತೆಗೆದುಕೊಳ್ಳದಿದ್ದರೆ ಅವರ ಮೊಬೈಲ್ ಸಂಖ್ಯೆಯನ್ನು ಹ್ಯಾಕ್ ಮಾಡಲಾಗಿದೆ ಎಂದು ಹೇಳಿ ಅವರಿಗೆ ಹೆದರಿಸಿ ಚಾಲೆಂಜ್ ಪೂರೈಸುವಂತೆ ಬೆದರಿಕೆ ಒಡ್ಡಲಾಗುತ್ತಿದೆ. ಇದೇ ರೀತಿ ಒಂದೊಂದೇ ಚಾಲೆಂಜ್ಗಳನ್ನು ಮಾಡಿಸುತ್ತಾ, ಕೊನೆ ಹಂತದಲ್ಲಿ ಆತ್ಮಹತ್ಯೆ ಚಾಲೆಂಜ್ ಅನ್ನೂ ನೀಡಲಾಗುತ್ತಿದೆ.
ಈ ಮೊಮೊ ಚಾಲೆಂಜ್ ಗೆ ಒಳಗಾದ್ ಅರ್ಜೆಂಟೀನಾದ 12 ವರ್ಷದ ಬಾಲಕಿ ಆತ್ಮಹತ್ಯೆ ಮಾಡಿಕೊಂಡಿದ್ದು, ಆಕೆಯ ಸಾವನ್ನಪ್ಪಲು ಮೊಮೊ ಚಾಲೆಂಜ್ ಕಾರಣ ಎಂದು ಪೊಲೀಸರು ತಿಳಿಸಿಾರೆ.
ಬಾಲಕಿ ಆತ್ಮಹತ್ಯೆ ಮಾಡಿಕೊಳ್ಳುವ ಕೆಲವೇ ಕ್ಷಣಗಳ ಮುಂಚೆ ಆಕೆಯ ಚಟುವಟಿಕೆಗಳನ್ನು ಮೊಬೈಲ್ನಲ್ಲಿ ಚಿತ್ರೀಕರಿಸಿದ್ದಾಳೆ. ಹಾಗಾಗಿ ತನಿಖೆ ವೇಳೆ ಬಾಲಕಿ ಆತ್ಮಹತ್ಯೆ ಮಾಡಿಕೊಳ್ಳಲು ಯಾರೋ ಪ್ರೇರೇಪಿಸಿರುವುದು ತಿಳಿದು ಬಂದಿದೆ ಎಂದು ಬ್ಯೂನೊಸ್ ಏರ್ಸ್ ಟೈಮ್ಸ್ ವರದಿ ಮಾಡಿದೆ.
ಈ ಮೊಮೊ ಚಾಲೆಂಜ್ಗೆ ಮಕ್ಕಳೇ ಪ್ರಮುಖ ಟಾರ್ಗೆಟ್ ಆಗಿದ್ದು, ಅವರಿಂದ ಹಂತ ಹಂತವಾಗಿ ಸರಣಿ ಹಿಂಸಾತ್ಮಕ ಕೃತ್ಯ ಮಾಡಿಸುವುದರ ಜತೆ ಆತ್ಮಹತ್ಯೆ ಮಾಡಿಕೊಳ್ಳಲು ಪ್ರೇರೇಪಿಸುತ್ತಿದೆ ಎಂದು ತಿಳಿದು ಬಂದಿದೆ.
