ಕಳೆದ ಎರಡು ದಿನಗಳಿಂದ ಜೆಪಿ ನಗರದ 6ನೇ ಹಂತ 28ನೇ ಎ ಮುಖ್ಯರಸ್ತೆಯಲ್ಲಿ ‘ನೋ ಪಾರ್ಕಿಂಗ್’ ಸ್ಥಳದಲ್ಲಿ ನಿಲ್ಲಿಸಿದ್ದ ಆಡಿ ಕಾರು ಈಗ ಆನ್‌ಲೈನ್‌ನಲ್ಲಿ ಸದ್ದು ಮಾಡಿದೆ. ಈ ಕಾರಿನ ನೋಂದಣಿ ಸಂಖ್ಯೆ ಆಧರಿಸಿ ಇದು ನಟ ರಕ್ಷಿತ್ ಶೆಟ್ಟಿಗೆ ಸೇರಿದ್ದು ಎನ್ನಲಾಗಿದೆ.
ಜೆಪಿ ನಗರದ ನಿವಾಸಿ ಧನಂಜಯ ಪದ್ಮನಾಭಾಚಾರ್ ಎಂಬುವವರು ನೋ ಪಾರ್ಕಿಂಗ್ ಜಾಗದಲ್ಲಿ ನಿಂತಿದ್ದ ಈ ಕಾರಿನ ಫೋಟೋ ತೆಗೆದು ಟ್ವಿಟರ್‌ನಲ್ಲಿ ಟ್ರಾಪಿಕ್ ಪೊಲೀಸರ ಗಮನಕ್ಕೆ ತಂದಿದ್ದಾರೆ. ನಟ ರಕ್ಷಿತ್ ಶೆಟ್ಟಿಗೆ ಟ್ಯಾಗ್ ಮಾಡಿರುವ ಅವರು, ಆರ್‌‍ಟಿಒ ದಾಖಲೆಗಳಲ್ಲಿ ನಿಮ್ಮ ಹೆಸರಿದ್ದು ಈ ಕಾರು ನಿಮ್ಮದೇನಾ ಎಂದು ರಕ್ಷಿತ್‌ರನ್ನು ಪ್ರಶ್ನಿಸಿದ್ದಾರೆ?
“ಈ ಕಾರು ಇಲ್ಲಿಗೆ ಬಂದಗಲೆಲ್ಲಾ ನೋ ಪಾರ್ಕಿಂಗ್ ಜಾಗದಲ್ಲೇ ನಿಲ್ಲಿಸಲಾಗುತ್ತಿದೆ. ಈ ಜಾಗದಲ್ಲಿ ನಿಲ್ಲಿಸಬೇಡಿ, ರಸ್ತೆ ತಿರುವಿನಲ್ಲಿ ಇಕ್ಕಟ್ಟಾಗುತ್ತದೆ ಎಂದು ಕಾರಿನ ಚಾಲಕನಿಗೆ ಸೆಕ್ಯುರಿಟಿ ಗಾರ್ಡ್‌ಗಳು ಎಷ್ಟು ಸಲ ಹೇಳಿದರೂ ಪ್ರಯೋಜನವಾಗಿಲ್ಲ. ನಿಯಮಗಳು ಇರುವುದು ಜನಸಾಮಾನ್ಯರಿಗೆ ಮಾತ್ರವೇ? ಸ್ಯಾಂಡಲ್‍ವುಡ್ ಹೀರೋಗಳಿಗೆ ಸಪರೇಟ್ ಆಗಿ ಏನಾದರೂ ರೂಲ್ಸ್ ಇವೆಯಾ?” ಎಂದು ಅವರು ಪ್ರಶ್ನಿಸಿದ್ದಾರ
ಇಲ್ಲಿ ಅಪಘಾತವಾಗುವ ಸಾಧ್ಯತೆಗಳಿರುವ ಕಾರಣ ಜೆಪಿ ನಗರದ 28ನೇ ಎ ಮುಖ್ಯರಸ್ತೆಯಲ್ಲಿ ನೋ ಪಾರ್ಕಿಂಗ್ ಬೋರ್ಡ್ ಕಳೆದ ಮೂರು ವರ್ಷಗಳಿಂದ ಇದೆ. ಇಷ್ಟಕ್ಕೂ ಈ ಕಾರು ಯಾರಿಗೆ ಸೇರಿದ್ದು? ರಕ್ಷಿತ್ ಶೆಟ್ಟಿ ಅವರಿಗೇ ಸೇರಿದ್ದಾ? ಎಂದು ತಿಳಿದುಕೊಳ್ಳಲು ಅವರ ಮ್ಯಾನೇಜರ್‌ಗೆ ಕರೆ ಮಾಡಲಾಗಿ ಅವರು ನೀಡಿದ ವಿವರಗಳು ಈ ರೀತಿ ಇವೆ.
“ಈ ಕಾರನ್ನು ರಕ್ಷಿತ್ ಶೆಟ್ಟಿ ತಮ್ಮ ಗೆಳೆಯನಿಗೆ ಮಾರಾಟ ಮಾಡಿದ್ದಾರೆ. ಹಾಗಾಗಿ ಈ ಕಾರು ಅವರಿಗೆ ಸೇರಿದ್ದಲ್ಲ” ಎಂದು ರಕ್ಷಿತ್ ಶೆಟ್ಟಿ ಮ್ಯಾನೇಜರ್ ತಿಳಿಸಿದ್ದಾರೆ. ಜೆಪಿ ನಗರ ಪೊಲೀಸರು ಈ ಕಾರನ್ನು ಅಲ್ಲಿಂದ ತೆರವುಗೊಳಿಸುವುದಾಗಿ ಹೇಳಿದ್ದಾರೆ.
“ಯಾವುದೇ ವಾಹನ ಸುಮಾರು ದಿನ ಒಂದೇ ಕಡೆ ಇದ್ದರೆ ಕಾನೂನು ಮತ್ತು ಸುವ್ಯಸ್ಥೆ ಪೊಲೀಸರು ಇದನ್ನು ವಶಕ್ಕೆ ಪಡೆಯುತ್ತಾರೆ. ಈ ವಾಹನದಿಂದ ಟ್ರಾಫಿಕ್‌ಗೆ ಸಮಸ್ಯೆಯಾಗುತ್ತಿರುವ ಕಾರಣ ಅದನ್ನು ಅಲ್ಲಿಂದ ತೆರವುಗೊಳಿಸುತ್ತೇವೆ” ಎಂದು ಟೈಮ್ಸ್ ಆಫ್ ಇಂಡಿಯಾಗೆ ಅಧಿಕಾರಿಗಳು ತಿಳಿಸಿದ್ದಾರೆ.
