ಗಾಂಧಿನಗರ: ಗುಜರಾತ್‌ನಲ್ಲಿ ಇನ್ಮುಂದೆ ಏಷಿಯಾಟಿಕ್ ಸಿಂಹಗಳಿಗೆ ಕಿರುಕುಳ ನೀಡಿದರೆ ಕಠಿಣ ಶಿಕ್ಷೆ ನೀಡಬೇಕಾಗುತ್ತದೆ ಎಂದು ಗುಜರಾತ್ ಸರಕಾರ ಆದೇಶ ನೀಡಿದೆ. ವನ್ಯಜೀವಿ ಸಂರಕ್ಷಣಾ ಕಾಯಿದೆ, 1972ರ ಸೆಕ್ಷನ್ 9ರಡಿ ಗಂಭೀರ ಕ್ರಮ ಕೈಗೊಳ್ಳಬೇಕಾಗುತ್ತದೆ ಎಂದು ಗುಜರಾತ್ ಸರಕಾರ ಎಚ್ಚರಿಕೆ ನೀಡಿದೆ.
ಕಾನೂನು ಬಾಹಿರವಾಗಿ ಸಿಂಹದ ಕಾರ್ಯಕ್ರಮಗಳನ್ನು ಆಯೋಜಿಸುವುದು, ಗಾಡಿಗಳಲ್ಲಿ ಸಿಂಹಗಳನ್ನು ಅಟ್ಟಿಸಿಕೊಂಡು ಹೋಗುವುದು ಹಾಗೂ ಅಕ್ರಮವಾಗಿ ವಿಡಿಯೋಗಳನ್ನು ತೆಗೆಯುವುದು ಸೇರಿ ಹಲವು ರೀತಿಯ ಕಿರುಕುಳಗಳನ್ನು ನೀಡುವುದನ್ನು ಇದು ಒಳಗೊಂಡಿದೆ. ಅಲ್ಲದೆ, ಸಿಂಹಗಳಿಗೆ ಕಿರುಕುಳ ನೀಡುವುದನ್ನು ಕಂಡುಬಂದರೆ, ಆರೋಪಿಗಳ ಮೇಲೆ 7 ವರ್ಷದವರೆಗೆ ಕಠಿಣ ಶಿಕ್ಷೆಗೆ ಗುರಿಪಡಿಸಲಾಗುವುದು ಎಂದು ಸರಕಾರ ಎಚ್ಚರಿಸಿದೆ. ಜತೆಗೆ, ಸದ್ಯ ಸಿಂಹಗಳ ಆವಾಸಸ್ಥಾನವನ್ನು ನಾಲ್ಕು ಪ್ರಾಧಿಕಾರಗಳು ನೋಡಿಕೊಳ್ಳುತ್ತಿವೆ. ಇದನ್ನು ಒಂದು ಪ್ರಾಧಿಕಾರಕ್ಕೆ ತರುವುದಾಗಿಯೂ ಸರಕಾರ ಘೋಷಿಸಿದೆ.
ಪ್ರಾಣಿಗಳಿಗೆ ತೊಂದರೆ ಕೊಡುವವರ ಮೇಲೆ ಪ್ರಾಣಿ ಬೇಟೆಯ ಆರೋಪಗಳನ್ನು ಹಾಕುವಂತೆ ಅರಣ್ಯ ಅಧಿಕಾರಿಗಳಿಗೆ ನಿರ್ದೇಶನ ನೀಡಿರುವುದಾಗಿ ಗುಜರಾತ್ ಅರಣ್ಯ ಸಚಿವ ಗಣಪತ್ ತಿಳಿಸಿದ್ದಾರೆ. ಪ್ರಾಣಿ ಬೇಟೆ ಅಂದರೆ ಕಾಯಿದೆಯಡಿ ಪ್ರಾಣಿಗಳನ್ನು ಕೊಲ್ಲುವುದು ಮಾತ್ರವಲ್ಲ. ಸಿಂಹ ಹಾಗೂ ಹುಲಿಗಳಂತ ಶೆಡ್ಯೂಲ್ 1ರಡಿ ಬರುವ ಪ್ರಾಣಿಗಳಿಗೆ ಕಿರುಕುಳ ನೀಡುವುದು ಸಹ ಈ ವ್ಯಾಪ್ತಿಗೆ ಬರುತ್ತದೆ. ಶೆಡ್ಯೂಲ್ 1 ರಡಿ ಬರುವ ಪ್ರಾಣಿಗಳಿಗೆ ವನ್ಯಜೀವಿ ಸಂರಕ್ಷಣಾ ಕಾಯಿದೆಯಡಿ ಹೆಚ್ಚು ರಕ್ಷಣೆ ನೀಡಲಾಗುತ್ತದೆ. ಆದರೆ, ಈವರೆಗೆ ಅತಿಕ್ರಮಣ ಪ್ರವೇಶಕ್ಕೆ ಮಾತ್ರ ಅಪರಾಧಿಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ಗಣಪತ್ ಹೇಳಿದ್ದಾರೆ.
ಇತ್ತೀಚೆಗೆ ಗುಜರಾತ್‌ನ ಕಾಡಿನಲ್ಲಿ ಸಿಂಹಗಳಿಗೆ ತೊಂದರೆ ಕೊಡುತ್ತಿರುವ ಹಲವು ವಿಡಿಯೊಗಳು ವೈರಲ್ ಆಗಿದ್ದವು. ಬೈಕ್‌ ಹಾಗೂ ಕಾರುಗಳಲ್ಲಿ ಸಿಂಹಗಳನ್ನು ಅಟ್ಟಾಡಿಸಿಕೊಂಡು ಹೋಗುವ ವಿಡಿಯೊಗಳು ಹಾಗೂ ಮಾಂಸಕ್ಕಾಗಿ ಹೆಣ್ಣು ಸಿಂಹ ಬೇಡುವಂತೆ ಮಾಡುವ ವಿಡಿಯೊ ಸಹ ಸಾಮಾಜಿಕ ಜಾಲತಾಣಗಳಲ್ಲಿ ಇತ್ತೀಚೆಗೆ ಸುದ್ದಿಯಾಗಿತ್ತು. ಈ ಸಂಬಂಧ ಗುಜರಾತ್ ಸರಕಾರ ತೀವ್ರ ಟೀಕೆಗೆ ಗುರಿಯಾಗಿತ್ತು. ಈ ಹಿನ್ನೆಲೆ, ಸಿಂಹಗಳ ರಕ್ಷಣೆ ವಿಚಾರವಾಗಿ ಇತ್ತೀಚೆಗೆ ಸಿಎಂ ವಿಜಯ್ ರೂಪಾನಿ ಸಭೆ ನಡೆಸಿದ್ದು, ಈ ವೇಳೆ ಸಿಂಹಗಳ ರಕ್ಷಣೆಗೆ ಉತ್ತಮ ವಿಧಾನಗಳನ್ನು ಅನುಸರಿಸಲು ಚರ್ಚೆ ನಡೆಸಿದ್ದರು. ಬಳಿಕ ಏಷಿಯಾಟಿಕ್ ಸಿಂಹಗಳು ಹೆಚ್ಚಾಗಿ ವಾಸ ಮಾಡುವ ಗಿರ್ ಅಭಯಾರಣ್ಯದಲ್ಲಿ ಮನುಷ್ಯ ಹಾಗೂ ಪ್ರಾಣಿಗಳ ನಡುವಿನ ಸಂಘರ್ಷಗಳನ್ನು ತಪ್ಪಿಸಲು 13 ಅಂಶಗಳ ಸಂರಕ್ಷಣಾ ಯೋಜನೆಗಳನ್ನು ಅರಣ್ಯ ಸಚಿವರು ಘೋಷಿಸಿದ್ದರು.
2015ರ ಜನಗಣತಿ ಪ್ರಕಾರ ಗುಜರಾತ್‌ನಲ್ಲಿ 523 ಸಿಂಹಗಳಿದ್ದು, ಗಿರ್ ಅಭಯಾರಣ್ಯದ ವ್ಯಾಪ್ತಿಯಲ್ಲಿ ಬರುವ ಜುನಾಗಢ ಹಾಗೂ ಸುತ್ತಮುತ್ತಲ ಜಿಲ್ಲೆಗಳಾದ ಅಮ್ರೇಲಿ, ಭಾವನಗರ, ಗಿರ್ ಸೋಮನಾಥ್ ಹಾಗೂ ಪೋರಬಂದರ್‌ನ ಸುಮಾರು 1500 ಗ್ರಾಮಗಳ ಬಳಿ ಸಿಂಹಗಳು ವಾಸ ಮಾಡುತ್ತಿವೆ.
