ಬೆಂಗಳೂರು, ಮೇ 12-ತಮ್ಮ ಇಳಿವಯಸ್ಸಿನಲ್ಲೂ ಮತದಾನ ಮಾಡಲು ಉತ್ಸಾಹದಿಂದ ಬಂದ ವೃದ್ಧರೊಬ್ಬರಿಗೆ ಸಿಬ್ಬಂದಿ ನಿಮ್ಮ ಹೆಸರು ಮತದಾರರ ಪಟ್ಟಿಯಲ್ಲಿಲ್ಲ ಎಂದು ಶಾಕ್ ಕೊಟ್ಟಿದ್ದು, ಇದರಿಂದ ಕೆರಳಿದ ಅವರು ಪ್ರತಿಭಟನೆ ನಡೆಸಿದ ಘಟನೆ ಶಿವಾಜಿನಗರದ ಮತಗಟ್ಟೆಯೊಂದರಲ್ಲಿ ನಡೆದಿದೆ.
ಶಿವಾಜಿನಗರ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯ ಮೌಂಟ್ ಕಾರ್ಮೆಲ್ ಮತಗಟ್ಟೆಗೆ 92 ವರ್ಷದ ಸುರೇಂದ್ರಬಟ್ನಾಗರ್ ಅವರು ನಡೆಯಲು ಸಾಧ್ಯವಾಗದಿದ್ದರೂ ತಮ್ಮ ಹಕ್ಕನ್ನು ಚಲಾಯಿಸಲೇ ಬೇಕೆಂದು ವ್ಹೀಲ್‍ಛೇರ್‍ನಲ್ಲಿ ಉತ್ಸಾಹದಿಂದ ಬಂದಿದ್ದರು.
ಆದರೆ ಚುನಾವಣಾ ಸಿಬ್ಬಂದಿ ನಿಮ್ಮ ಹೆಸರು ಪಟ್ಟಿಯಲ್ಲಿಲ್ಲ. ಹಾಗಾಗಿ ನಿಮಗೆ ಮತದಾನ ಮಾಡಲು ಅವಕಾಶವಿಲ್ಲ ಎಂದಿದ್ದಾರೆ. ಇದರಿಂದ ತೀವ್ರ ಆಕ್ರೋಶಗೊಂಡ ವೃದ್ದರು ಕೂಡಲೇ ಪ್ರತಿಭಟನೆಗಿಳಿದರು.
ಪ್ರತಿಭಟನೆಯಿಂದ ಎಚ್ಚೆತ್ತ ಚುನಾವಣಾ ಸಿಬ್ಬಂದಿ ಆಗ ಮತ್ತೆ ಮತದಾರರ ಪಟ್ಟಿಯನ್ನು ಕೂಲಂಕಷವಾಗಿ ಪರಿಶೀಲಿಸಿ ಹೆಸರು ಪತ್ತೆ ಹಚ್ಚಿ ಮತದಾನಕ್ಕೆ ಅವಕಾಶ ಕಲ್ಪಿಸಿದರು.
