ಬೆಂಗಳೂರು, ಏ.11-ಕಾಂಗ್ರೆಸ್‍ನಿಂದ ಟಿಕೆಟ್ ಪಡೆಯಲು ವಿವಿಧ ಕ್ಷೇತ್ರಗಳ ಆಕಾಂಕ್ಷಿಗಳು ಇಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರನ್ನು ಭೇಟಿ ಮಾಡಿ ತಮಗೆ ಸ್ಪರ್ಧಿಸಲು ಅವಕಾಶ ನೀಡುವಂತೆ ಮನವಿ ಮಾಡಿದರೆ, ಕೆಲ ಆಕಾಂಕ್ಷಿಗಳಿಗೆ ಟಿಕೆಟ್ ನೀಡಲೇಬೇಕೆಂದು ಒತ್ತಾಯಿಸಿದ ಪ್ರಸಂಗವೂ ನಡೆದಿದೆ.
ಬೆಂಗಳೂರಿನ ಸಿ.ವಿ.ರಾಮನ್‍ನಗರ ವಿಧಾನಸಭಾ ಕ್ಷೇತ್ರದಿಂದ ಮಹದೇವಪ್ಪ ಪುತ್ರ ಸುನೀಲ್‍ಬೋಸ್‍ಗೆ ಟಿಕೆಟ್ ನೀಡಿ ನಾವು ಅವರನ್ನು ಗೆಲ್ಲಿಸಿಕೊಂಡು ಬರುತ್ತೇವೆ ಎಂದು ಬೋಸ್ ಬೆಂಬಲಿಗರು ಮುಖ್ಯಮಂತ್ರಿ ಅವರ ಮನೆ ಮುಂದೆ ಜಮಾಯಿಸಿ ಆಗ್ರಹಿಸಿದ್ದಾರೆ.
ಸಚಿವ ಟಿ.ಬಿ.ಜಯಚಂದ್ರ ತಮ್ಮ ಮಗನಿಗೆ ಚಿಕ್ಕನಾಯಕನಹಳ್ಳಿಯಿಂದ ಟಿಕೆಟ್ ನೀಡುವಂತೆ ಕೋರಲು ಆಗಮಿಸಿದ್ದರೆ, ತರೀಕೆರೆಯ ಶ್ರೀನಿವಾಸ್, ಅರಸೀಕೆರೆ ಶ್ರೀನಿವಾಸ್, ಮಾಜಿ ಮೇಯರ್ ಪದ್ಮಾವತಿ ಸೇರಿದಂತೆ ಇನ್ನಿತರ ಆಕಾಂಕ್ಷಿಗಳು ಮುಖ್ಯಮಂತ್ರಿಗಳ ಭೇಟಿಗೆ ಬಂದು ಟಿಕೆಟ್‍ಗಾಗಿ ಮನವಿ ಮಾಡಿದರು.
ಇದರೊಂದಿಗೆ ಶಾಸಕ ಹ್ಯಾರೀಸ್‍ಗೆ ತಪ್ಪಿಸದಂತೆ ಆಗ್ರಹಿಸಲು ಅಪಾರ ಬೆಂಬಲಿಗರೇ ಬಂದು ಸೇರಿದ್ದರು. ಟಿಕೆಟ್ ಆಕಾಂಕ್ಷಿತರೊಂದಿಗೆ ಅವರ ಬೆಂಬಲಿಗರು ಆಗಮಿಸಿದ್ದರಿಂದ ಮುಖ್ಯಮಂತ್ರಿ ನಿವಾಸದ ಬಳಿ ಎಲ್ಲೆಲ್ಲೂ ಜನರೇ ತುಂಬಿದ್ದರು.
ಇವರೊಂದಿಗೆ ಅವರ ಅಪಾರ ಸಂಖ್ಯೆಯ ಬೆಂಬಲಿಗರು ಸಿಎಂ ಮನೆ ಮುಂದೆ ಆಗಮಿಸಿದ್ದರಿಂದ ಜನಜಂಗುಳಿಯೇ ನೆರೆದಂತಾಗಿತ್ತು.
