ತಿರುವನಂತಪುರಂ : ಕಳೆದು ಹಲವು ಮಂದಿ ಪ್ರಾಣ ತೆಗೆದಿದ್ದ ನಿಫಾ ವೈರಸ್ ಸೋಂಕು ಕೇರಳದಲ್ಲಿ ಕಾಣಿಸಿಕೊಂಡಿದೆ. 23 ವರ್ಷದ ಯುವಕನಲ್ಲಿ ಈ ಸೋಂಕು ಕಾಣಿಸಿಕೊಂಡಿದ್ದು, ಆತಂಕ ಪಡುವ ಅಗತ್ಯವಿಲ್ಲ ಎಂದು ಸರ್ಕಾರ ತಿಳಿಸಿದೆ.
ಎರ್ನಾಕುಲಂನ ಖಾಸಗಿ ಆಸ್ಪತ್ರೆಯಲ್ಲಿ ದಾಖಲಾಗಿರುವ ಯುವಕನಲ್ಲಿ ನಿಫಾ ವೈರಸ್ ಪತ್ತೆಯಾಗಿರುವುದನ್ನು ಕೇರಳ ಆರೋಗ್ಯ ಸಚಿವ ಕೆಕೆ ಶೈಲಾಜಾ ಸ್ಪಷ್ಟಪಡಿಸಿದ್ದಾರೆ.
ಇಬ್ಬರಿಗೆ ನಿಫಾ ವೈರಸ್ ಜ್ವರದ ಲಕ್ಷಣ ಪತ್ತೆಯಾಗಿದೆ. ಇದರಲ್ಲಿ ಒಬ್ಬರನ್ನು ತೀವ್ರ ನಿಗಾಘಟಕದಲ್ಲಿ ಇಡಲಾಗಿದೆ. ಗಂಭೀರ ಪರಿಸ್ಥಿತಿ ಇಲ್ಲದಿದ್ದರೂ ಜ್ವರ ಹಾಗೂ ಗಂಟಲು ನೋವು ಉಲ್ಬಣಗೊಂಡ ಹಿನ್ನೆಲೆ ಅವರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ.
ರೋಗ ಪತ್ತೆಯಾಗಿರುವ ಹುಡುಗನ ಸಂಪರ್ಕಹೊಂದಿರುವ 86 ಮಂದಿಯನ್ನು ಪರೀಕ್ಷೆಗೆ ಒಳಪಡಿಸಲಾಗುತ್ತಿದೆ. ನಿಫಾ ವೈರಸ್ ಹರಡದಂತೆ ಕಟ್ಟೆಚ್ಚರ ವಹಿಸಲಾಗಿದ್ದು, ಇದರಿಂದ ಗಾಬರಿ ಪಡುವ ಅಗತ್ಯವಿಲ್ಲ. ಪರಿಸ್ಥಿತಿ ನಿಭಾಯಿಸಲು ಆರೋಗ್ಯ ಇಲಾಖೆ ಸಜ್ಜಾಗಿದೆ ಎಂದು ಅವರು ತಿಳಿಸಿದ್ದಾರೆ.
ಇನ್ನು ಈ ರೋಗಿಯನ್ನು ಉಪಚರಿಸುತ್ತಿದ್ದ ಇಬ್ಬರು ನರ್ಸ್ಗಳಿಗೂ ಗಂಟಲು ಬೇನೆ ಕಾಣಿಸಿಕೊಂಡಿದ್ದು, ಅವರನ್ನು ಪರೀಕ್ಷೆಗೆ ಒಳಪಡಿಸಲಾಗಿದೆ.
ನಿಫಾ ಸೋಂಕಿತರಿಗಾಗಿ ಕಲಮಸೆರಿ ಮೆಡಿಕಲ್ ಕಾಲೇಜಿನಲ್ಲಿ ವಿಶೇಷ (ಐಸೋಲೇಷನ್) ವಾರ್ಡ್ ಮಾಡಲಾಗಿದ್ದು, ಇಂತಹ ರೋಗಿಗಳಿಗಾಗಿ ವಿಶೇಷ ಆಂಬ್ಯೂಲೆನ್ಸ್ ವ್ಯವಸ್ಥೆ ಕೂಡ ಮಾಡಲಾಗಿದೆ,
ಕಳೆದ ವರ್ಷ 17 ಮಂದಿ ಬಲಿ ತೆಗೆದುಕೊಂಡಿದ್ದ ನಿಫಾ
ಕಳೆದ ವರ್ಷ ಕಾಜೀಕೋಡ್ ಹಾಗೂ ಮಲಪ್ಪುರಂನಲ್ಲಿ ಕಾಣಿಸಿಕೊಂಡ ಈ ನಿಫಾ ವೈರಸ್ಗೆ 17 ಮಂದಿ ಬಲಿಯಾಗಿದ್ದರು. ಕಲ್ಲಿಕೋಟೆಯಲ್ಲಿ ಕಾಣಿಸಿಕೊಂಡಿದ್ದ ಈ ಸೋಂಕು ರಾಜ್ಯದಲ್ಲಿ ಆತಂಕ ಸೃಷ್ಟಿಸಿತು. ಕರ್ನಾಟಕದಲ್ಲಿ ಕೂಡ ಈ ರೋಗ ಹರಡದಂತೆ ಕಟ್ಟೆಚ್ಚರ ವಹಿಸಲಾಗಿತ್ತು.
ಬಾವಲಿ ಹಾಗೂ ಹಂದಿಯಿಂದ ಹರಡುವ ಈ ವೈರಸ್ನಿಂದಾಗಿ ತಲೆ ನೋವು, ಜ್ವರ, ಮೂರ್ಛೆ, ವಾಕರಿಕೆ, ಹೊಟ್ಟೆನೋವು, ವಾಂತಿಯಂತಹ ಲಕ್ಷಣಗಳು ಕಂಡು ಬರುತ್ತದೆ. ಇದು ಒಬ್ಬರಿಂದ ಒಬ್ಬರಿಗೆ ಹರಡುವ ಕಾಯಿಲೆಯಾಗಿದೆ.
