ಹೊಶಿಯಾರ್: ಸನ್ನಿ ಡಿಯೋಲ್ ಅಥವಾ ಸನ್ನಿಲಿಯೋನ್‌ ಯಾರೇ ಬಂದರೂ ಪಂಜಾಬ್‌ನಲ್ಲಿರುವ ಕಾಂಗ್ರೆಸ್ ಅಲೆಯನ್ನು ತಡೆಯಲು ಸಾಧ್ಯವಿಲ್ಲ ಎಂದು ಬಿಜೆಪಿ ಅಭ್ಯರ್ಥಿ ವಿರುದ್ಧ ಪಂಜಾಬ್‌ನ ಹೋಶಿಯಾರ್‌ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ರಾಜ್‌ ಕುಮಾರ್‌ ಚಬ್ಬೇವಾಲ್‌ ಕಿಡಿಕಾರಿದ್ದಾರೆ.
ಪ್ರಧಾನಿ ನರೇಂದ್ರ ಮೋದಿಯವರ ಸರ್ಕಾರವು ಶೋಚನೀಯವಾಗಿ ವಿಫಲವಾಗಿದೆ. ಪಂಜಾಬ್‌ನ ಮೂರು ಕ್ಷೇತ್ರಗಳಿಗೆ ಕೂಡ ಅವರಿಗೆ ಅಭ್ಯರ್ಥಿಯನ್ನು ಹುಡುಕಲು ಸಾಧ್ಯವಾಗಿಲ್ಲ. ಗುರುದಾಸ್‌ಪುರದಿಂದ ಸನ್ನಿ ಡಿಯೋಲ್ ಅವರನ್ನು ಕಣಕ್ಕಿಳಿಸಿದ್ದಾರೆ. ಬಿಜೆಪಿಯು ಸನ್ನಿ ಡಿಯೋಲ್ ಅಥವಾ ಸನ್ನಿ ಲಿಯೋನ್ ಯಾರನ್ನೇ ಕರೆತಂದರೂ ಕೂಡ ಈ ಚಂಡಮಾರುತದದ ಎದುರು ನಿಲ್ಲಲು ಸಾಧ್ಯವಾಗುವುದಿಲ್ಲ ಎಂದು ಹೇಳಿದ್ದಾರೆ.
ಇತ್ತೀಚೆಗಷ್ಟೇ ಬಿಜೆಪಿ ಸೇರಿ ಗುರುದಾಸ್‌ಪುರದ ಅಭ್ಯರ್ಥಿಯಾಗಿರುವ ಸನ್ನಿ ಡಿಯೋಲ್ ಅವರಿಗೆ ಕ್ಷೇತ್ರದ ಬಗ್ಗೆ ಏನು ಗೊತ್ತಿದೆ? ಪಂಜಾಬ್‌ನ ಸಮಸ್ಯೆಗಳ ಬಗ್ಗೆ ಅವರಿಗೆ ಅರಿವಿಲ್ಲ. ಸನ್ನಿ ಡಿಯೋಲ್ ಅವರು ಗುರುದಾಸ್‌ಪುರ ಕುರಿತು ತಮ್ಮ ನಿಲುವೇನು ಎಂಬುದನ್ನು ತಿಳಿಸಲಿ. ರಾಜಕೀಯ ಎನ್ನುವುದು ಗಂಭೀರ ಉದ್ಯಮ ಮತ್ತು ಅದು ಕಾಲಹರಣದ ಚಟುವಟಿಕೆಯಲ್ಲ ಎಂದು ಪಂಜಾಬ್‌ ಕಾಂಗ್ರೆಸ್ ಮುಖ್ಯಸ್ಥ ಸುನೀಲ್‌ ಜಾಖರ್‌ ತಿಳಿಸಿದ್ದಾರೆ.
ನಾಮಪತ್ರ ಸಲ್ಲಿಸಿದಾಗ ಗುರುದಾಸ್‌ಪುರದಲ್ಲಿ ನಡೆದ ಬಿಜೆಪಿ ರ‍್ಯಾಲಿಯಲ್ಲಿ ಅವರಿಗೆ ಭಾಷಣ ಮಾಡಲು ಸಹ ಬರಲಿಲ್ಲ ಮತ್ತು ಕೇವಲ ಅವರ ಚಿತ್ರದ ಡೈಲಾಗ್‌ಗಳನ್ನಷ್ಟೇ ಹೇಳಿದರು ಎಂದು ಟೀಕಿಸಿದ್ದಾರೆ.
