ನವದೆಹಲಿ, ಮಾ.22- ಚೌಕೀದಾರರ ಹೆಸರು ಹೇಳಿಕೊಂಡು ಅಬ್ಬರದ ಪ್ರಚಾರ ಗಿಟ್ಟಿಸುತ್ತಿರುವ ಪ್ರಧಾನಿ ನರೇಂದ್ರ ಮೋದಿ ಕಾವಲುಗಾರರ ಹಿತರಕ್ಷಣೆಗಾಗಿ ಏಕೆ ಸ್ಪಂದಿಸುತ್ತಿಲ್ಲ ಎಂದು ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಪ್ರಶ್ನಿಸಿದ್ದಾರೆ.
ಜಾರ್ಖಂಡ್‍ನಲ್ಲಿ ವೇತನ ಪಾವತಿಯಾಗದೆ 10ಸಾವಿರಕ್ಕೂ ಹೆಚ್ಚು ಕಾವಲುಗಾರರು ನಡೆಸಿದ ಪ್ರತಿಭಟನೆ ಕುರಿತು ಮಾಧ್ಯಮ ವರದಿಯನ್ನು ಫೇಸ್‍ಬುಕ್‍ನಲ್ಲಿ ಪೋಸ್ಟ್ ಮಾಡಿರುವ ರಾಹುಲ್ ಮೋದಿಯವರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.
ಚೌಕೀದಾರ್ ಹೆಸರಿನ ಹಿಂದೆ ಅಡಗಿರುವ ಪ್ರಧಾನಿ ಮೋದಿ ಮೇ ಭಿ ಚೌಕೀದಾರ್ ಎಂಬ ಅಭಿಯಾನದ ಮೂಲಕ ಪ್ರಚಾರ ಪಡೆದುಕೊಳ್ಳುತ್ತಿದ್ದಾರೆ. ಆದರೆ ಅತ್ಯಂತ ಕಡಿಮೆ ಸಂಬಳ ಪಡೆದು ಅಥವಾ ಸಂಬಳ ಇಲ್ಲದೆ ತೀವ್ರ ಸಂಕಷ್ಟಕ್ಕೆ ಸಿಲುಕಿರುವ ಕಾವಲುಗಾರರ ಕಲ್ಯಾಣಕ್ಕಾಗಿ ಮೋದಿ ಯಾವ ಕ್ರಮ ಕೈಗೊಂಡಿದ್ದಾರೆ ಎಂದು ರಾಹುಲ್ ಪ್ರಶ್ನಿಸಿದ್ದಾರೆ.
