ಭೋಪಾಲ್: ಕ್ಷಣಕ್ಷಣಕ್ಕೂ ಮಧ್ಯಪ್ರದೇಶ ವಿಧಾನಸಭೆ ಚುನಾವಣೆ ಕುತೂಹಲ ಮೂಡಿಸುತ್ತಿದ್ದು, ಬೆಳಗ್ಗೆಯಿಂದ ಮುನ್ನಡೆಯತ್ತ ಕಾಂಗ್ರೆಸ್ ಇದೀಗ ಇಳಿಕೆ ಕ್ರಮದಲ್ಲಿ ಸಾಗಿದೆ. ಒಂದೊಮ್ಮೆ 115ಕ್ಷೇತ್ರಗಳಲ್ಲಿ ಮುನ್ನಡೆ ಪಡೆದುಕೊಂಡಿದ್ದ ಕಾಂಗ್ರೆಸ್ ಸದ್ಯ 108 ಸ್ಥಾನಗಳಿಗೆ ಕುಸಿತ ಕಂಡಿದೆ.
ಇತ್ತ ಆಡಳಿತರೂಢ ಬಿಜೆಪಿ ಪಕ್ಷ ಮ್ಯಾಜಿಕ್ ನಂಬರ್ನತ್ತ ದಾಪುಗಾಲಿಟ್ಟಿದ್ದು, 116 ಕ್ಷೇತ್ರಗಳ ಪೈಕಿ 114 ಕ್ಷೇತ್ರಗಳಲ್ಲಿ ತನ್ನ ಹಿಡಿತ ಸಾಧಿಸಿದೆ. ಮ್ಯಾಜಿಕ್ ನಂಬರ್ ತಲುಪಲು ಕೇವಲ 2 ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸುವುದು ಅವಶ್ಯವಿದೆ.
ಆಡಳಿತರೂಢ ವಿರೋಧಿ ಅಲೆ ನಡುವೆ ಕೂಡ ಶಿವರಾಜ್ ಸಿಂಗ್ ಚೌಹಾಣ್ ತಮ್ಮ ಅಸ್ಥಿತ್ವ ಹಿಡಿದುಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ. ಮತ ಎಣಿಕೆ ಆರಂಭ ಆದಾಗಿನಿಂದಲೇ ಕಾಂಗ್ರೆಸ್ – ಬಿಜೆಪಿ ನಡುವೆ ತೀವ್ರ ಪೈಪೋಟಿ ಏರ್ಪಟ್ಟಿತ್ತು. ಆದರೆ ಕಾಂಗ್ರೆಸ್ ಅಲ್ಪ ಮುನ್ನಡೆ ಗಳಿಸಿತು. ಅದಾದ ಬಳಿಕ ಮತ್ತೆ ಬಿಜೆಪಿ ಮುನ್ನಡೆಗಳಿಸಿತು.
ಇನ್ನೇನು ಬಿಜೆಪಿ ನೂರರ ಗಡಿದಾಟಿತು ಎನ್ನುವಾಗಲೇ ಕಾಂಗ್ರೆಸ್ ಮ್ಯಾಜಿಕ್ ನಂಬರ್ ತಲುಪಿಯೇ ಬಿಟ್ಟಿತು. ಕಾಂಗ್ರೆಸ್ ಮಧ್ಯಪ್ರದೇಶ ವಶಪಡಿಸಿಕೊಂಡಿತು ಎನ್ನುವಾಗಲೇ, ಬಿಜೆಪಿ ಮುನ್ನಡೆ ಗಳಿಸುವ ಮೂಲಕ ಫಲಿತಾಂಶ ಎರಡೂ ಪಕ್ಷಗಳ ಕಾರ್ಯಕರ್ತರು, ಬೆಂಬಲಿಗರು, ಫ್ಯಾನ್ಸ್ಗಳನ್ನ ತುದಿಗಾಲ ಮೇಲೆ ನಿಲ್ಲುವಂತೆ ಮಾಡಿತು.
ಸತತ 15 ವರ್ಷಗಳ ಆಡಳಿತ ನಡೆಸಿ, ಆಡಳಿತ ವಿರೋಧಿ ಅಲೆ ಇದ್ದರೂ ನಾಲ್ಕನೇ ಬಾರಿಗೆ ಅಧಿಕಾರಕ್ಕೆ ಬರಲು ಶಿವರಾಜ್ ಸಿಂಗ್ ಚೌಹಾಣ್ ಹರಸಾಹಸ ಮಾಡುತ್ತಿದ್ದಾರೆ. ಅಂತಿಮ ಫಲಿತಾಂಶ ಏನ್ ಆಗುತ್ತೋ ಅನ್ನೋದಕ್ಕೆ ಮಧ್ಯಾಹ್ನ ಎರಡರವರೆಗೂ ಕಾಯಲೇಬೇಕಿದೆ.
