ಪಾಟ್ನಾ,ಜೂ.9: ಬಿಹಾರದ ಶಾಲೆ ಪರೀಕ್ಷಾ ಮಂಡಳಿಯಲ್ಲಿ 2 ವರ್ಷಗಳ ಹಿಂದೆ ನಡೆದಿದ್ದ ಟಾಪರ್‌ ಹಗರಣ ಮರೆಯಾಗುವ ಮುನ್ನವೇ ಮತ್ತೆ ಅನೇಕ ಎಡವಟ್ಟುಗಳು ಬೆಳಕಿಗೆ ಬಂದಿವೆ. ಕೆಲ ಹನ್ನೆರಡನೆಯ ತರಗತಿ ವಿದ್ಯಾರ್ಥಿಗಳಿಗೆ ಒಟ್ಟು ಅಂಕಗಳಿಗಿಂತ ಹೆಚ್ಚು ಅಂಕಗಳನ್ನು ಬಿಹಾರ ಶಿಕ್ಷಣ ಮಂಡಳಿ ನೀಡಿದೆ. ಇನ್ನು ಕೆಲವು ವಿದ್ಯಾರ್ಥಿಗಳಿಗೆ ತಾವು ಬರೆಯದೇ ಇರುವ ವಿಷಯಗಳ ಪೇಪರ್‌ಗಳಿಗೆ ಅಂಕ ನೀಡಿದ್ದಾರೆಂದು ದೂರು ನೀಡಿದ್ದಾರೆ.
ಬಿಹಾರದ ಅರ್ವಾಲ್ ಜಿಲ್ಲೆಯ ಭೀಮ್ ಕುಮಾರ್ ಎಂಬ ವಿದ್ಯಾರ್ಥಿಗೆ ಗಣಿತ ಥಿಯರಿ ಪರೀಕ್ಷೆಯಲ್ಲಿ ಒಟ್ಟು 35 ಅಂಕಗಳಿಗೆ 38 ಅಂಕಗಳನ್ನು ನೀಡಲಾಗಿದೆ. ಅಲ್ಲದೆ, ವಸ್ತುನಿಷ್ಠ ವಿಭಾಗದ ಪ್ರಶ್ನೆಗಳಲ್ಲಿ 35 ಕ್ಕೆ 37 ಅಂಕಗಳನ್ನು ನೀಡಲಾಗಿದೆ. ಇನ್ನು, ಈ ಬಗ್ಗೆ ಮಾತನಾಡಿದ ಭೀಮ್ ಕುಮಾರ್, ಇಂತಹ ಘಟನೆಗಳು ನಮ್ಮ ರಾಜ್ಯದ ಪರೀಕ್ಷೆಯಲ್ಲಿ ಹೆಚ್ಚಾಗಿ ನಡೆಯುತ್ತಿರುತ್ತದೆ. ಹೀಗಾಗಿ ನಾನು ಶಾಕ್‌ಗೊಳಗಾಗಿಲ್ಲ ಎಂದು ಹೇಳಿಕೊಂಡಿದ್ದಾನೆ. ಇದೇ ರೀತಿ, ಭೌತಶಾಸ್ತ್ರ ಪರೀಕ್ಷೆಯಲ್ಲಿ ಸಂದೀಪ್ ರಾಜ್ ಎಂಬುವನಿಗೆ 35 ಕ್ಕೆ 38 ಅಂಕಗಳನ್ನು ಬೋರ್ಡ್ ನೀಡಿದೆ. ಈ ಬಗ್ಗೆ ಸಂದೀಪ್ ತೀವ್ರ ಅಚ್ಚರಿ ವ್ಯಕ್ತಪಡಿಸಿದ್ದು, ಅಲ್ಲದೆ,ಆಂಗ್ಲ ಹಾಗೂ ರಾಷ್ಟ್ರ ಭಾಷಾ ಪರೀಕ್ಷೆಯ ವಿಭಾಗದಲ್ಲಿ ನನಗೆ ಶೂನ್ಯ ಅಂಕಗಳನ್ನು ನೀಡಲಾಗಿದೆ ಎಂದು ಸಹ ಆಕ್ರೋಶ ವ್ಯಕ್ತಪಡಿಸಿದ್ದಾನೆ. ಮತ್ತೊಂದೆಡೆ,ಗಣಿತದ ವಸ್ತುನಿಷ್ಠ ವಿಭಾಗದ ಪರೀಕ್ಷೆಯಲ್ಲಿ ದರ್ಭಾಂಗದ ರಾಹುಲ್‌ ಎಂಬುವನಿಗೆ 40 ಅಂಕಗಳನ್ನು ನೀಡಲಾಗಿದೆ.
ಇನ್ನು, ಬಿಹಾರದ ವೈಶಾಲಿಯ ಜಾನ್ವಿ ಸಿಂಗ್ ಎಂಬ ವಿದ್ಯಾರ್ಥಿನಿ ಜೀವಶಾಸ್ತ್ರ ಪರೀಕ್ಷೆಗೆ ಹಾಜರಾಗದಿದ್ದರೂ, 18 ಅಂಕಗಳನ್ನು ನೀಡಿರುವುದು ವಿಚಿತ್ರ. ಇದೇ ರೀತಿ, ಪಟನಾದ ರಾಮಕೃಷ್ಣ ದ್ವಾರಿಕಾ ಕಾಲೇಜಿನ ಸತ್ಯ ಕುಮಾರ್ ಎಂಬುವರಿಗೆ ಸಹ ತಾವು ಹಾಜರಾಗದಿರುವ ಪರೀಕ್ಷೆಗೆ ಅಂಕ ನೀಡಿದ್ದಾರೆ ಎಂದು ಬಿಹಾರ ಶಾಲಾ ಶಿಕ್ಷಣ ಮಂಡಳಿಯ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
