ಅಬೋಟ್ ಪಾರ್ಕ್, ನ.23-ಶತಮಾನದ ಮಹಾಮಾರಿ ಎಂದೇ ಪರಿಗಣಿಸಲ್ಪಟ್ಟಿರುವ ಮಾರಕ ಏಡ್ಸ್ ರೋಗಕ್ಕೆ ಹೊಸ ಚಿಕಿತ್ಸಾ ವಿಧಾನಗಳ ಅಧ್ಯಯನ ಮತ್ತು ಸಂಶೋಧನೆಗಳು ಮುಂದುವರಿದಿವೆ.
ಅಂತೆಯೇ ಏಡ್ಸ್‍ಗೆ ಕಾರಣವಾಗುವ ಹ್ಯುಮನ್ ಇಮ್ಯೂನೋಡಿಫಿಷಿಯನ್ಸಿ ವೈರಸ್(ಎಚ್‍ಐವಿ) ಬಗ್ಗೆಯೂ ಮುಂದುವರಿದ ಸಂಶೋಧನೆಯೊಂದರಲ್ಲಿ ಅಬೋಟ್ ಸಂಸ್ಥೆಯು ಇದೇ ಮೊದಲ ಬಾರಿಗೆ ಹೊಸ ಉಪ-ವಿಧದ ಎಚ್‍ಐವಿ-1 ಎಂಬ ವೈರಾಣುವನ್ನು ಪತ್ತೆ ಮಾಡಿದೆ.
ಮಹತ್ವದ ಸಂಶೋಧನೆಯಿಂದಾಗಿ ವೈರಾಣು ಪತ್ತೆ ಮತ್ತು ಅದರ ನಿರ್ಮೂಲನೆಗೆ ಅಗತ್ಯವಾದ ಕ್ರಮಗಳನ್ನು ಕೈಗೊಳ್ಳುವಲ್ಲಿ ಜಾಗತಿಕ ಆರೋಗ್ಯ ಸಮುದಾಯಕ್ಕೆ ದೊಡ್ಡ ಮಟ್ಟದಲ್ಲಿ ನೆರವಾಗಲಿದೆ.
ಬಹುತೇಕ ಎರಡು ದಶಕಗಳ ನಂತರ ಇಂಥ ವೈರಸ್ ಪತ್ತೆಯಾಗಿರುವುದು ಇದೇ ಮೊದಲು ಎಂದು ಅಬೋಟ್ ಸಂಸ್ಥೆಯ ಜೀವ ವಿಜ್ಞಾನಿಗಳು ಹೇಳಿದ್ದಾರೆ.
ವಿಜ್ಞಾನಿಗಳ ಈ ಸಾಧನೆ ಬಗ್ಗೆ ಅಂತಾರಾಷ್ಟ್ರೀಯ ವೈದ್ಯಕೀಯ ನಿಯತಕಾಲಿಕಗಳಲ್ಲಿ ವಿಸ್ತತ ಲೇಖನಗಳು ಪ್ರಕಟವಾಗಿದ್ದು, ಏಡ್ಸ್ ಚಿಕಿತ್ಸೆಯಲ್ಲಿ ಒಂದು ದಿಟ್ಟ ಹೆಜ್ಜೆ ಎಂದು ಬಣ್ಣಿಸಿವೆ.
ಹೊಸ ವೈರಸ್(ಎಚ್‍ಐವಿ-1) ಪತ್ತೆಯಾಗಿರುವುದರಿಂದ ಏಡ್ಸ್ ರೋಗ ನಿರ್ಧಾರ ಪ್ರಯೋಗಗಳು, ಚಿಕಿತ್ಸಾ ವಿಧಾನಗಳು ಮತ್ತು ಪ್ರಬಲ ಲಸಿಕೆಯನ್ನು ಸಂಶೋಧನಾ ಸಮುದಾಯ ಅಭಿವೃದ್ದಿಗೊಳಿಸಲು ಸಹಕಾರಿಯಾಗಿದೆ. ವೈದ್ಯಕೀಯ ಕ್ಷೇತ್ರದಲ್ಲಿ ಇದೊಂದು ಅತ್ಯಂತ ಪ್ರಮುಖ ಸಂಶೋಧನೆಯಾಗಿದೆ.
