ಇಸ್ಲಾಮಾಬಾದ್‌: ಸಿಖ್ಖರ ಪ್ರಮುಖ ಯಾತ್ರಾ ಸ್ಥಳ ಕರ್ತಾರ್‌ಪುರಕ್ಕೆ ಭೇಟಿ ನೀಡುವ ಸಿಖ್‌ ಯಾತ್ರಾರ್ಥಿಗಳು ಪಾಸ್‌ಪೋರ್ಟ್‌ ಹೊಂದುವ ಅಗತ್ಯವಿಲ್ಲಎಂದು ಪಾಕಿಸ್ತಾನ ಹೇಳಿದೆ. ಜತೆಗೆ, ಮೊದಲ ಎರಡು ದಿನ 20 ಡಾಲರ್‌ ಸೇವಾ ಶುಲ್ಕವನ್ನು ರದ್ದುಪಡಿಸುವುದಾಗಿ ಘೋಷಿಸಿದೆ.
ಈ ಮೂಲಕ ನವೆಂಬರ್‌ 12ರಂದು ನಡೆಯುವ ಸಿಖ್‌ ಧರ್ಮಗುರು ಗುರುನಾನಕ್ ದೇವ್ ಅವರ 550ನೇ ಜಯಂತಿಯಲ್ಲಿಪಾಲ್ಗೊಳ್ಳಲು ಸಿಖ್‌ ಯಾತ್ರಿಕರಿಗೆ ಅನುಕೂಲವಾಗಲಿದೆ. ಪಾಕ್‌ ಸರಕಾರದ ಈ ನಿರ್ಧಾರವನ್ನು ಸ್ವಾಗತಿಸಿರುವ ಪಂಜಾಬ್‌ ಮುಖ್ಯಮಂತ್ರಿ ಕ್ಯಾ.ಅಮರೀಂದರ್‌ ಸಿಂಗ್‌ ಅವರು, ಸೇವಾಶುಲ್ಕವನ್ನು ಕಾಯಂ ರದ್ದು ಪಡಿಸಬೇಕು ಎಂದು ಮನವಿ ಮಾಡಿದ್ದಾರೆ.
ಕರ್ತಾರ್‌ಪುರದ ವಿಶೇಷ:
ಪಾಕಿಸ್ತಾನದ ಪಂಜಾಬ್‌ನ ನಾರೊವಾಲ್‌ ಜಿಲ್ಲೆಯಲ್ಲಿ, ರಾವಿ ನದಿ ದಂಡೆಯ ಮೇಲಿರುವ ಕರ್ತಾರ್‌ ಪುರವನ್ನು 1504ರಲ್ಲಿಸಿಖ್‌ ಧರ್ಮದ ಸಂಸ್ಥಾಪಕರಾದ ಗುರು ನಾನಕ್‌ ದೇವ್ ಅವರೇ ಸ್ಥಾಪಿಸಿದರೆಂಬ ಪ್ರತೀತಿಯದೆ. ಸಿಖ್‌ ಧರ್ಮದ ಉಗಮಸ್ಥಾನವಾದ ಈ ಕ್ಷೇತ್ರದಲ್ಲೇ ಗುರುನಾನಕ್ ತಮ್ಮ ಅಂತಿಮ 18 ವರ್ಷಗಳನ್ನು ಕಳೆದರು ಎಂಬ ನಂಬಿಕೆಯಿದೆ. ಇಲ್ಲಿ ಗುರುನಾನಕರು ಐಕ್ಯವಾದ ಸ್ಥಳದಲ್ಲಿ ಗುರುದ್ವಾರ ದರ್ಬಾರ್‌ ಸಾಹಿಬ್‌ ಕರ್ತಾರ್‌ ಪುರ ಮಂದಿರ ನಿರ್ಮಿಸಲಾಗಿದೆ. ಈ ಮಂದಿರವು ಭಾರತದ ಪಂಜಾಬ್‌ನಲ್ಲಿರುವ ಗಡಿ ಪಟ್ಟಣ ಡೇರಾ ಬಾಬಾ ನಾನಕ್‌ನಿಂದ 4.5 ಕಿ.ಮೀ. ದೂರದಲ್ಲಿದೆ.
