ಕಾಬೂಲ್, ಮೇ 31-ಹಿಂಸಾಚಾರ ಪೀಡಿತ ಆಫ್ಘಾನಿಸ್ತಾನದಲ್ಲಿ ತಾಲಿಬಾನ್ ಮತ್ತು ಇಸ್ಲಾಮಿಕ್ ಸ್ಟೇಟ್ ಉಗ್ರರ ಅಟ್ಟಹಾಸ ಮುಂದುವರಿದಿದೆ. ರಾಜಧಾನಿ ಕಾಬೂಲ್ ಸಮೀಪ ಇಂದು ಬೆಳಗ್ಗೆ ಆತ್ಮಾಹುತಿ ಕಾರ್ ಬಾಂಬ್ ಸ್ಫೋಟದಲ್ಲಿ 9 ಮಂದಿ ಹತರಾಗಿದ್ದು, ಅನೇಕರು ಗಾಯಗೊಂಡಿದ್ದಾರೆ.
ಆಫ್ಘಾನ್ ಸೇನಾ ಅಕಾಡೆಮಿ ಮತ್ತು ತರಬೇತಿ ಕೇಂದ್ರದ ಹೊರೆ ನಿನ್ನೆಯಷ್ಟೇ ನಡೆದ ಮಾನವ ಬಾಂಬ್ ದಾಳಿಯಲ್ಲಿ ಆರು ಮಂದಿ ಮೃತಪಟ್ಟು, ಕೆಲವರಿಗೆ ತೀವ್ರ ಗಾಯಗಳಾಗಿದ್ದವು. ಈ ಕೃತ್ಯದ ಬೆನ್ನಲ್ಲೇ ಮತ್ತೊಂದು ಆತ್ಮಾಹತ್ಯಾ ದಾಳಿ ನಡೆದಿದೆ.
ಪೂರ್ವ ಯಕಟೋಟ್‍ನಲ್ಲಿ ಈ ಕಾರ್‍ಬಾಂಬ್ ದಾಳಿ ನಡೆದಿದ್ದು, ಸಾವು-ನೋವಾಗಿದೆ ಎಂದು ಕಾಬೂಲ್ ಪೊಲೀಸ್ ಮುಖ್ಯ ವಕ್ತಾರ ಫಿರ್ದೋಸ್ ಫರಮಜ್ ಹೇಳಿದ್ದಾರೆ.
ಸ್ಫೋಟ ನಡೆದ ಸ್ಥಳದ ಬಳಿ ಅಮೆರಿಕ ಮತ್ತು ನ್ಯಾಟೋ ಮಿತ್ರ ಪಡೆಗಳ ನಿರ್ವಹಣಾ ಸಂಕೀರ್ಣಗಳು ಮತ್ತು ಆಘ್ಘನ್ ರಾಷ್ಟ್ರೀಯ ಭದ್ರತಾ ಪಡೆಗಳ ಕಾರ್ಯಾಚರಣೆ ಕೇಂದ್ರಗಳಿವೆ.
