ಮಂಡ್ಯ: ಕಾಂಗ್ರೆಸ್ ಪಕ್ಷದ ಯಾವುದೇ ಸಮಸ್ಯೆ ಪರಿಹಾರಕ್ಕೆ ರಾಜ್ಯ ನಾಯಕರು ಹಾಗೂ ಹೈಕಮಾಂಡ್ ಮುಂದೆ ಬರುವ ಹೆಸರು ಡಿಕೆ ಶಿವಕುಮಾರ್. ಡಿಕೆಶಿ ಕಾಂಗ್ರೆಸ್ಗೆ ಒಂದು ರೀತಿಯ ಆಪತ್ಭಾಂದವ ಇದ್ದ ಹಾಗೆ. ಶಿವಕುಮಾರ್ ಪ್ರಭಾವ ಜೆಡಿಎಸ್ ಕೂಡ ಚೆನ್ನಾಗಿಯೇ ಅರಿವಿದೆ. ಮೈತ್ರಿ ಸರ್ಕಾರ ರಚನೆ ವೇಳೆ ಡಿಕೆ ಶಿವಕುಮಾರ್ ವಹಿಸಿದ ಪಾತ್ರದಿಂದಾಗಿ ಕುಮಾರಸ್ವಾಮಿಗೆ ಮತ್ತಷ್ಟು ಹತ್ತಿರವಾದರು. ಇದಾದ ಬಳಿಕ ಡಿಕೆಶಿ- ಎಚ್ಡಿಕೆ ಆತ್ಮೀಯತೆ ಇನ್ನಷ್ಟು ಹೆಚ್ಚಿತು. ಇದೇ ಆಪ್ತತೆ ಮೇಲೆ ಕುಮಾರಸ್ವಾಮಿ ಈಗ ಮಗನ ಗೆಲ್ಲಿಸುವ ಹೊಣೆಯನ್ನು ಡಿಕೆ ಶಿವಕುಮಾರ್ ಅವರಿಗೆ ನೀಡಿದ್ದಾರೆ.
ಮಂಡ್ಯದಲ್ಲಿ ನಿಖಿಲ್ ಗೆಲುವಿಗೆ ಕಾಂಗ್ರೆಸ್ ನಾಯಕರೇ ಅಡ್ಡಿಯಾಗುವ ಸೂಚನೆ ಅರಿತ ಜೆಡಿಎಸ್ ನಾಯಕರು ಈಗಾಗಲೇ ಈ ಕುರಿತು ಅವರ ಗಮನಕ್ಕೆ ತಂದಿದ್ದಾರೆ.
ಡಿ.ಕೆ. ಶಿವಕುಮಾರ್ ಕೂಡ ರಾತ್ರೋರಾತ್ರಿ ಕಾಂಗ್ರೆಸ್ ನಾಯಕರಿಗೆ ಕ್ಲಾಸ್ ತೆಗೆದುಕೊಂಡಿದ್ದರು. ಶಿವಕುಮಾರ್ ನಡವಳಿಕೆ ರೆಬೆಲ್ ಕಾಂಗ್ರೆಸ್ ನಾಯಕರಲ್ಲಿ ಇನ್ನಷ್ಟು ಸಿಟ್ಟು ಮೂಡುವಂತೆ ಮಾಡಿತು. ಇದಾದ ಬಳಿಕ ಕೊಂಚ ತಣ್ಣಾಗಿರುವ ಡಿಕೆ ಶಿವಕುಮಾರ್ ಸುಮಲತಾ ನಿರ್ಧಾರದ ಬಳಿಕ ಮುಂದಿನ ನಡೆ ಕುರಿತು ತೀರ್ಮಾನ ಮಾಡೋಣ ಎಂದು ಕುಮಾರಸ್ವಾಮಿಗೆ ತಿಳಿಸಿದ್ದಾರೆ.
ಈಗಾಗಲೇ ಎಸ್ಎಂ ಕೃಷ್ಣ ಅವರನ್ನು ಭೇಟಿಯಾಗಿರುವ ಸುಮಲತಾ ಬಿಜೆಪಿಗೆ ಹೋಗುತ್ತಾರಾ ಅಥವಾ ಪಕ್ಷೇತರರಾಗಿ ಸ್ಪರ್ಧಿಸುತ್ತಾರಾ ಎಂಬ ಬಗ್ಗೆ ಸುಮಲತಾ ಮಾ.18ಕ್ಕೆ ನಿರ್ಧಾರ ಪ್ರಕಟಿಸುವುದಾಗಿ ತಿಳಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಸುಮಲತಾ ನಿಲುವಿನ ಬಳಿಕ ಮುಂದಿನ ನಡೆಯ ಬಗ್ಗೆ ಚರ್ಚಿಸೋಣ ಎಂದಿದ್ದಾರೆ.
ಈಗಾಗಲೇ ಕ್ಷೇತ್ರದಲ್ಲಿ ನಿಖಿಲ್ ಪರ ಒಲವು ಯಾವ ರೀತಿ ಇದೆ ಎಂಬ ಕುರಿತು ಆಪ್ತ ಸಚಿವರು, ಜೆಡಿಎಸ್ ಮುಖಂಡರಿಂದ ಕುಮಾರಸ್ವಾಮಿ ಮಾಹಿತಿ ಪಡೆದಿದ್ದಾರೆ.
ಕ್ಷೇತ್ರದಲ್ಲಿ ಮೂಡಿರುವ ವಿರೋಧಿ ಅಲೆಯನ್ನು ಹೇಗೆ ಸಕಾರಾತ್ಮಕವಾಗಿ ರೂಪಿಸಬಹುದು ಎಂಬ ಕುರಿತು ಚರ್ಚೆ ನಡೆಸಿದ್ದಾರೆ.
