ತಮಿಳುನಾಡಿನಲ್ಲಿ ಬಿಜೆಪಿ, ಆಡಳಿತಾರೂಢ ಎಐಎಡಿಎಂಕೆ ಜತೆ ನಟ ವಿಜಯಕಾಂತ್​ ಪಕ್ಷ ಮೈತ್ರಿ

ಚೆನ್ನೈ: ಲೋಕಸಭಾ ಚುನಾವಣೆಗೆ ದಿನಗನನೆ ಆರಂಭವಾಗಿದ್ದು, ರಾಷ್ಟ್ರ ರಾಜಕಾರಣದಲ್ಲಿ ರಾಜಕೀಯ ಚಟುವಟಿಕೆಗಳು ಗರಿಗೆದರಿದೆ. ತಮಿಳುನಾಡಿನ ಹಿರಿಯ ನಟ ಹಾಗೂ ರಾಜಕಾರಣಿ ವಿಜಯಕಾಂತ್​ ಅವರ ಡಿಎಂಡಿಕೆ ಪಕ್ಷ ಬಿಜೆಪಿ ಹಾಗೂ ಎಐಎಡಿಎಂಕೆ ಜತೆ ಮೈತ್ರಿ ಮಾಡಿಕೊಂಡಿದೆ.

ವಿಜಯಕಾಂತ್​ ಅವರ ಡಿಎಂಡಿಕೆ(ದೇಶಿಯ ಮರ್ಪೋಕು ದ್ರಾವಿಡ ಕಳಗಂ) ಪಕ್ಷ ತಮಿಳುನಾಡಿನ ಆಡಳಿತಾರೂಢ ಎಐಎಡಿಎಂಕೆ ಮತ್ತು ಅದರ ಮೈತ್ರಿ ಪಕ್ಷಗಳಾದ ಬಿಜೆಪಿ ಹಾಗೂ ಪಿಎಂಕೆ(ಪಟ್ಟಲಿ ಮಕ್ಕಳ್​ ಕಟ್ಚಿ) ಪಕ್ಷದ ಜತೆ ಹೊಂದಾಣಿಕೆ ಮಾಡಿಕೊಂಡಿದೆ. ಈ ಕುರಿತು ನಟ ವಿಜಯ​ಕಾಂತ್​ ತಮ್ಮ ನಿರ್ಧಾರವನ್ನು ತಿಳಿಸಿದ್ದಾರೆ. ಡಿಎಂಡಿಕೆ ಪಕ್ಷವು ತಮಿಳುನಾಡಿನ ಒಟ್ಟಾರೆ 39 ಲೋಕಸಭಾ ಸ್ಥಾನಗಳಲ್ಲಿ 4 ಕ್ಷೇತ್ರಗಳಲ್ಲಿ ಕಣಕ್ಕಿಳಿಯಲಿದೆ.

ತಮಿಳುನಾಡು ಮುಖ್ಯಮಂತ್ರಿ ಕೆ. ಪಳನಿಸ್ವಾಮಿ ಹಾಗೂ ಉಪ ಮುಖ್ಯಮಂತ್ರಿ ಒ. ಪನ್ನಿರ್​ಸೆಲ್ವಂ ಹಾಗೂ ವಿಜಯಕಾಂತ್​ ಮತ್ತು ಡಿಎಂಡಿಕೆ ಖಜಾಂಚಿ, ಪತ್ನಿ ಪ್ರೇಮಲತಾ ಅವರ ಸಮ್ಮುಖದಲ್ಲಿ ಉಭಯ ಪಕ್ಷದ ಉನ್ನತ ನಾಯಕರ ನಡುವೆ ಈ ಒಪ್ಪಂದ ನಡೆದಿದೆ.

ತಮಿಳುನಾಡಿನ ಉತ್ತರ ಭಾಗದಲ್ಲಿ ಸಕ್ರಿಯವಾಗಿರುವ ವಿಜಯಕಾಂತ್​ ಪಕ್ಷ ಪಿಎಂಕೆ ಪಕ್ಷಕ್ಕೆ ಸಮಾನಾವಾಗಿ 7 ಸ್ಥಾನಗಳನ್ನು ನೀಡುವಂತೆ ಕೇಳಿಕೊಂಡಿತ್ತು. ಆದರೆ, ಅಂತಿಮವಾಗಿ ಎಐಡಿಎಂಕೆ 4 ಸ್ಥಾನಗಳನ್ನು ಬಿಟ್ಟುಕೊಟ್ಟಿದೆ.

ಮೈತ್ರಿ ಪಕ್ಷಗಳ ಒಪ್ಪಂದದಂತೆ ತಮಿಳುನಾಡಿನ 5 ಕ್ಷೇತ್ರಗಳಲ್ಲಿ ಬಿಜೆಪಿ ಸ್ಪರ್ಧಿಸಲಿದ್ದು, 7 ಸ್ಥಾನಗಳಲ್ಲಿ ಪಿಎಂಕೆ ಕಣಕ್ಕಿಳಿಯಲಿದೆ. ಪಿಟಿ, ಎನ್​ಜೆಆರ್​ ಮತ್ತು ಎನ್​ಆರ್​ ಕಾಂಗ್ರೆಸ್​ ಪಕ್ಷಗಳು ತಲಾ ಒಂದೊಂದು ಪಕ್ಷದಲ್ಲಿ ಸ್ಪರ್ಧಿಸಲಿವೆ.

Vijayakanth’s DMDK joins AIADMK-BJP alliance for Lok Sabha poll in Tamil Nadu