ಇಸ್ಲಾಮಾಬಾದ್: ಪಾಕಿಸ್ತಾನ ಭಾರತದ ಗಡಿಯಲ್ಲಿ ತನ್ನ ಬಲವನ್ನು ಹೆಚ್ಚಿಸಿಕೊಳ್ಳಲು ಭಾರಿ ಯೋಜನೆ ರೂಪಿಸಿದ್ದು, ಇದಕ್ಕಾಗಿ ರಷ್ಯಾದಿಂದ 600 ಯುದ್ಧ ಟ್ಯಾಂಕ್‌ಗಳನ್ನು ಖರೀದಿಸಲಿದೆ ಎಂದು ಗುಪ್ತಚರ ಮೂಲಗಳು ತಿಳಿಸಿವೆ.
ಅತ್ಯಾಧುನಿಕ ಟಿ-90 ಟ್ಯಾಂಕ್‌ಗಳೂ ಇದರಲ್ಲಿ ಸೇರಿದ್ದು, ಇವುಗಳನ್ನು ಜಮ್ಮು-ಕಾಶ್ಮೀರದ ಗಡಿ ನಿಯಂತ್ರಣಾ ರೇಖೆಯುದ್ದಕ್ಕೂ ನಿಯೋಜನೆಗೊಳಿಸಲಾಗುವುದು. ಬಹುತೇಕ ಟ್ಯಾಂಕ್‌ಗಳು 3ರಿಂದ 4 ಕಿ.ಮೀ. ವ್ಯಾಪ್ತಿಯಯ ಗುರಿಯನ್ನು ಹೊಡೆಯಬಲ್ಲ ಸಾಮರ್ಥ್ಯ ಹೊಂದಿರಲಿವೆ ಎಂದು ತಿಳಿದುಬಂದಿದೆ.
ಇಟಲಿಯಿಂದಲೂ ಶಸ್ತ್ರಾಸ್ತ್ರ: ಇದರ ಜತೆಗೆ, ಪಾಕಿಸ್ತಾನವು ಇಟಲಿಯಿಂದ 250 ಸಂಖ್ಯೆಯಲ್ಲಿ ‘150ಎಂಎಂ ಎಸ್‌ಪಿ ಮೈಕ್‌-10’ ಗನ್‌ಗಳನ್ನು ತರಿಸಿಕೊಳ್ಳುತ್ತಿದ್ದು, ಈಗಾಗಲೇ ಈ ಪೈಕಿ 120 ಗನ್‌ಗಳು ಪಾಕ್ ಸೇನೆಯ ಬತ್ತಳಿಕೆ ಸೇರಿವೆ.
ಭಾರತ ರಷ್ಯಾದಿಂದ ಟಿ-90 ಟ್ಯಾಂಕ್‌ಗಳನ್ನು ಖರೀದಿಸಿರುವ ಹಿನ್ನೆಲೆಯಲ್ಲಿ, ಇದಕ್ಕೆ ಪ್ರತಿಯಾಗಿ ಪಾಕಿಸ್ತಾನವೂ ರಷ್ಯಾದಿಂದ ಇದೇ ಟ್ಯಾಂಕ್‌ಗಳನ್ನ ಖರೀದಿಸಿ ಸಮಬಲ ಸಾಧನೆ ಮಾಡಲು ಯೋಜಿಸಿದೆ. ಜತೆಗೆ ರಷ್ಯಾ ಸರಕಾರದೊಂದಿಗೆ ಆಳವಾದ ರಕ್ಷ ಣಾ ಒಪ್ಪಂದವನ್ನು ಮಾಡಿಕೊಳ್ಳಲು ಮುಂದಾಗಿದೆ ಎಂದು ಹೇಳಲಾಗಿದೆ.
ಈ ನಿಟ್ಟಿನಲ್ಲಿ ಈಗಾಗಲೇ ಪಾಕಿಸ್ತಾನವು ಕಳೆದ ಹಲವು ವರ್ಷಗಳಿಂದ ರಷ್ಯಾ ಜತೆ ಜಂಟಿ ಸಮರಾಭ್ಯಾಸ ನಡೆಸುತ್ತಿರುವುದನ್ನೂ ಇಲ್ಲಿ ಸ್ಮರಿಸಬಹುದು.
ಈ ನಡುವೆ ಭಾರತ-ಪಾಕ್ ಗಡಿ ನಿಯಂತ್ರಣ ರೇಖೆ ಬಳಿ ಕಳೆದ ಒಂದು ವರ್ಷದಿಂದ ಉದ್ವಿಗ್ನತೆ ಹೆಚ್ಚಾಗಿರುವ ಸಂದರ್ಭದಲ್ಲೇ ಪಾಕಿಸ್ತಾನ ಸೇನೆಯ ಬಲವರ್ಧನೆಗೆ ಮುಂದಾಗಿರುವುದು ಗಮನಾರ್ಹ. ಪಾಕ್ ಸೇನೆ ನಡೆಸುವ ಪ್ರತಿಯೊಂದು ಅಪ್ರಚೋದಿತ ದಾಳಿಗೂ ಭಾರತೀಯ ಸೇನೆ ದಿಟ್ಟ ಪ್ರತ್ಯುತ್ತರ ನೀಡುತ್ತಿದೆ.
2025ರ ವೇಳೆಗೆ ಶಸಸ್ತ್ರ ಪಡೆಯನ್ನು ಭಾರಿ ಮಟ್ಟದಲ್ಲಿ ಬಲಪಡಿಸುವ ಮಹತ್ವದ ಯೋಜನೆಯ ಭಾಗವಾಗಿ, ಒಟ್ಟು 360 ಯುದ್ಧ ಟ್ಯಾಂಕ್‌ಗಳನ್ನು ಖರೀದಿಸುವ ಗುರಿಯನ್ನು ಪಾಕ್ ಹೊಂದಿದೆ. ಈ ಪೈಕಿ ಮಿತ್ರ ಚೀನಾದಿಂದಲೇ ದೇಶಿಯವಾಗಿ ತಯಾರಿಸಲಾದ 220 ಟ್ಯಾಂಕ್‌ಗಳನ್ನೂ ಪಾಕಿಸ್ತಾನ ಖರೀದಿಸಲಿದೆ. ಈ ಗುರಿಯನ್ನು ತಲುಪಲು ಪಾಕಿಸ್ತಾನಕ್ಕೆ ನೆರವಾಗುವುದಾಗಿ ಚೀನಾ ಈಗಾಗಲೇ ಭರವಸೆ ನೀಡಿದೆ.
Pakistan procuring 600 tanks to strengthen capability along border with India: Intelligence Sources
