ಬೆಂಗಳೂರು, ಡಿ.3-ಕರ್ನಾಟಕ ರಿಪಬ್ಲಿಕನ್ ಸೇನೆ ವತಿಯಿಂದ ಡಾ.ಬಿ.ಆರ್.ಅಂಬೇಡ್ಕರ್ ಅವರ 62ನೇ ಪರಿನಿರ್ವಾಣದ ಅಂಗವಾಗಿ 6ನೇ ಮುಂಬೈ ಮಹಾಯಾತ್ರೆಯನ್ನು ಹಮ್ಮಿಕೊಳ್ಳಲಾಗಿದೆ ಎಂದು ರಾಜ್ಯಾಧ್ಯಕ್ಷ ಜಿಗಣಿ ಶಂಕರ್ ತಿಳಿಸಿದ್ದಾರೆ.
ಈಗಾಗಲೇ ಯಾತ್ರೆ ಆರಂಭವಾಗಿದ್ದು, ಬೆಂಗಳೂರು ನಗರದ ವಿವಿಧೆಡೆ ಇರುವ ಅಂಬೇಡ್ಕರ್ ಅವರ ಪ್ರತಿಮೆ ಶುದ್ಧೀಕರಣ, ಕರಪತ್ರ, ಭಾಷಣ, ಮಾಲಾರ್ಪಣೆ, ಬೆಳಕಿನ ದೀಪ ಹಚ್ಚುವುದರ ಮೂಲಕ ಅಂಬೇಡ್ಕರ್ ಅವರ ಆಶಯವನ್ನು ಜನರಿಗೆ ತಿಳಿಸಲಾಗುತ್ತಿದೆ ಎಂದು ಹೇಳಿದರು.
ನಗರದ ಗೂಡ್‍ಶೆಟ್‍ರಸ್ತೆ, ಜೆ.ಜೆ.ನಗರ, ಶಾಂತಿನಗರ, ನಂಜಪ್ಪ ವೃತ್ತ, ಅಂಬೇಡ್ಕರ್ ಇಂಜಿನಿಯರಿಂಗ್, ಮೆಡಿಕಲ್ ಕಾಲೇಜು, ಟ್ಯಾನರಿರಸ್ತೆ ಹೀಗೆ ನಗರದೆಲ್ಲೆಡೆ ಇರುವ ಅಂಬೇಡ್ಕರ್ ಪ್ರತಿಮೆಗಳಿಗೆ ಮಾರ್ಲಾಪಣೆ ಮಾಡಿ, ನಾಳೆ ಸಂಜೆ ವಿಧಾನಸೌಧ ಮುಂಭಾಗವಿರುವ ಅಂಬೇಡ್ಕರ್ ಪ್ರತಿಮೆಗೆ ಮಾಲಾರ್ಪಣೆ ಮಾಡಲಾಗುವುದು.
ಡಿ.5 ರಂದು ಮುಂಜಾನೆ 5.30ಕ್ಕೆ ಯಶವಂತಪುರದಿಂದ ಚಾಲುಕ್ಯ ಎಕ್ಸ್‍ಪ್ರೆಸ್ ಮೂಲಕ ಮುಂಬೈಗೆ ತೆರಳಲಾಗುವುದು. ಅಲ್ಲಿನ ಚೈತ್ರ ಭೂಮಿಯಲ್ಲಿನ ಅಂಬೇಡ್ಕರ್ ಸಮಾಧಿಗೆ ಪುಷ್ಪ ನಮನ ಸಲ್ಲಿಸಲಾಗುವುದು ಎಂದು ತಿಳಿಸಿದರು.
