ಪಿಟ್ಸ್ಬರ್ಗ್: ಅಮೆರಿಕದ ಪಿಟ್ಸ್ಬರ್ಗ್ನಲ್ಲಿರುವ ಯಹೂದಿಗಳ ಧಾರ್ಮಿಕ ಸ್ಥಳ ‘ಟ್ರೀ ಆಫ್ ಲೈಫ್’ ಮೇಲೆ ನಡೆದ ಶೂಟ್ಔಟ್ನಲ್ಲಿ ಮೃತಪಟ್ಟವರ ಸಂಖ್ಯೆ 11ಕ್ಕೆ ಏರಿಕೆಯಾಗಿದೆ. ಗುಂಡಿನ ದಾಳಿ ನಡೆಸುವುದಕ್ಕೂ ಮೊದಲು ಬಂದೂಕುಧಾರಿ ‘ಎಲ್ಲ ಯಹೂದಿಗಳು ಸಾಯಲೇಬೇಕು’ ಎಂಬ ಘೋಷಣೆ ಕೂಗಿದ್ದ ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ. ಇದು ಯಹೂದಿಗಳನ್ನೇ ಗುರಿಯಾಗಿಸಿಕೊಂಡು ನಡೆಸಿದ ದಾಳಿ ಎಂಬುದು ಈ ಮೂಲಕ ಸಾಬೀತಾಗಿದೆ.
11 ಜನರನ್ನು ಬಲಿ ತೆಗೆದುಕೊಂಡ ವ್ಯಕ್ತಿ ರಾಬರ್ಟ್ ಬೋವರ್ಸ್ ಎಂದು ಗುರುತಿಸಲಾಗಿದೆ. ಈತನನ್ನು ಪೊಲೀಸರು ಬಂಧಿಸಿ ವಶಕ್ಕೆ ಪಡೆದಿದ್ದಾರೆ. ಜನಾಂಗೀಯ ನಿಂದನೆ ಹಾಗೂ ಕೊಲೆ ಆರೋಪವನ್ನು ಈತನ ಮೇಲೆ ಹೊರಿಸಲಾಗಿದ್ದು, ಸ್ಥಳೀಯ ನ್ಯಾಯಾಲಯ ರಾಬರ್ಟ್ಗೆ ಮರಣದಂಡನೆ ನೀಡುವ ಸಾಧ್ಯತೆ ಇದೆ.‘
ಯಹೂದಿಗಳ ಧಾರ್ಮಿಕ ಸ್ಥಳವಾದ “ಟ್ರೀ ಆಫ್ ಲೈಫ್” ಮೇಲೆ ಅಮೆರಿಕದ ಕಾಲಮಾನದಂತೆ ಬೆಳಗ್ಗೆ 9:45ರ ಸುಮಾರಿಗೆ ದಾಳಿಯಾಗಿದೆ. ಆ ಸಂದರ್ಭದಲ್ಲಿ ಯಹೂದಿಗಳ ಧಾರ್ಮಿಕ ಶಬ್ಬತ್ ಆಚರಣೆ ಶುರುವಾಗಿತ್ತು. ರಜೆಯ ದಿನವಾದ್ದರಿಂದ ಈ ಸ್ಥಳದಲ್ಲಿ ಹೆಚ್ಚಿನ ಭದ್ರತೆ ಇರಲಿಲ್ಲ. ಧಾರ್ಮಿಕ ಕಾರ್ಯಕ್ರಮವಾದ್ದರಿಂದ ಯಾರು ಬೇಕಾದರೂ ಬಂದು ಹೋಗಬಹುದಾಗಿತ್ತು. ದುಷ್ಕರ್ಮಿ ದಾಳಿಯಾದಾಗ 50-60 ಜನರು ಪೂಜೆಗೆ ಸೇರಿದ್ದರೆನ್ನಲಾಗಿದೆ.
ಈ ದಾಳಿಗೆ ವಿಶ್ವದಾದ್ಯಂತ ಖಂಡನೆ ವ್ಯಕ್ತವಾಗಿದೆ. ‘ಯಹೂದಿಗಳ ವಿರುದ್ಧ ನಡೆದ ಈ ದಾಳಿಯನ್ನು ಸಹಿಸುವುದಿಲ್ಲ. ಈ ರೀತಿ ಅಪರಾಧ ತಡೆಯಲು ನಾವು ಒಂದಾಗಬೇಕು’ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕರೆ ನೀಡಿದ್ದಾರೆ.
