ಶಾಲಾ ಬಸ್ ಚಾಲಕನಿಂದ ಮೂರು ವರ್ಷದ ಬಾಲಕಿ ಮೇಲೆ ಅತ್ಯಾಚಾರ

ನೊಯ್ಡಾ: ಮೂರು ವರ್ಷದ ಮಗುವಿನ ಮೇಲೆ ಖಾಸಗಿ ಶಾಲೆಯ ಬಸ್​ ಚಾಲಕ ಅತ್ಯಾಚಾರ ಎಸಗಿರುವ ಘೋರ ಘಟನೆ ಬೆಳಕಿಗೆ ಬಂದಿದೆ.

ಗುರುಗ್ರಾಮದಲ್ಲಿ ಈ ಘಟನೆ ನಡೆದಿದ್ದು, ಆರೋಪಿ ವಿರುದ್ಧ ಪೊಕ್ಸೊ ಮತ್ತು ಐಪಿಸಿ ಸೆಕ್ಷನ್​ 376ಎ, 376ಬಿ ಅಡಿ ಪ್ರಕರಣ ದಾಖಲಿಸಿಳ್ಳಲಾಗಿದ್ದು, ಆರೋಪಿಗಾಗಿ ಪೊಲೀಸರು ಜಾಲ ಬೀಸಿದ್ದಾರೆ.

ಮಗಳನ್ನ ಬಸ್​ ನಿಲ್ದಾಣದಿಂದ ಕರೆದುಕೊಂಡು ಬರಲು ತೆರಳಿದ್ದ ಬಾಲಕಿಯ ತಂದೆಗೆ ವಿಷಯ ತಿಳಿದು ಬಂದಿದೆ. ಅಪ್ಪನನ್ನು ನೋಡಿದ ಕೂಡಲೇ ಬಾಲಕಿ ಜೋರಾಗಿ ಅಳಲಾರಂಭಿಸಿದ್ದಾಳೆ. ವಿಚಾರಣೆ ನಡೆಸಿದಾಗ, ಬಸ್​ ಚಾಲಕ ಮಗುವಿನ ಒಳ ಉಡುಪುಗಳನ್ನು ತೆಗೆದು, ಆಕೆಯನ್ನು ಅನುಚಿತವಾಗಿ ನಡೆಸಿಕೊಂಡಿರುವುದರ ಬಗ್ಗೆ ಅಪ್ಪನ ಬಳಿ ಮಗು ಹೇಳಿಕೊಂಡಿದ್ದಾಳೆ.

ವೃತ್ತಿಯಲ್ಲಿ ವಕೀಲೆಯಾಗಿರುವ ಬಾಲಕಿಯ ತಾಯಿ ಈ ಕುರಿತು ವಿಚಾರಿಸಿದಾಗ, ಅಮ್ಮನ ಬಳಿಯೂ ಘಟನೆಯನ್ನು ವಿವರಿಸಿದ್ದಾಳೆ. ಅಲ್ಲದೇ ಘಟನೆ ಬಗ್ಗೆ ಯಾರಬಳಿಯೂ ಹೇಳಿಬಾರದು, ಹೇಳಿದರೆ ಹೊಡೆಯುವುದಾಗಿ ಚಾಲಕ ಹೆದರಿಸಿದ್ದಾಗಿಯೂ ಮಗು ಹೇಳಿಕೊಂಡಿದೆ.

ಘಟನೆಯಿಂದ ಕಂಗಾಲಾಗಿರುವ ಪಾಲಕರು ಶಾಲೆಗೆ ತೆರಳಿ ಚಾಲಕನ ಬಗ್ಗೆ ವಿಚಾರಿಸಿ, ಪೊಲೀಸ್​ ಠಾಣೆಗೆ ದೂರು ನೀಡಿದ್ದಾರೆ. ದೂರು ದಾಖಲಿಸಿ 15 ದಿನಗಳಾಗಿದ್ದರೂ ಇನ್ನೂ ಚಾಲಕ ಪತ್ತೆಯಾಗಿಲ್ಲ. ಪೊಲೀಸರು ಆರೋಪಿಯನ್ನು ಬಂಧಿಸಿ, ಕ್ರಮಕ್ಕೆ ಮುಂದಾಗದಿರುವುದು ಪೋಷಕರ ಆಕ್ರೋಶಕ್ಕೆ ಕಾರಣವಾಗಿದೆ.