ದಿಗ್ಗಜ ದಿಲೀಪ್ ಕುಮಾರ್ (95) ತೀವ್ರ ಅಸ್ವಸ್ಥಗೊಂಡಿದ್ದು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಮತ್ತೆ ಮತ್ತೆ ಕಾಡುತ್ತಿರುವ ನ್ಯೂಮೋನಿಯಾ ಸಮಸ್ಯೆಯಿಂದ ಬಳಲುತ್ತಿರುವ ಅವರನ್ನು ಭಾನುವಾರ ರಾತ್ರಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ದಿಲೀಪ್ ಆರೋಗ್ಯ ಪರಿಸ್ಥಿತಿಯನ್ನು ಕಾಲಕಾಲಕ್ಕೆ ಅಭಿಮಾನಿಗಳು, ಹಿತೈಷಿಗಳಿಗೆ ತಿಳಿಸಲಾಗುತ್ತಿದೆ ಎಂದು ದಿಲೀಪ್ ಕುಟುಂಬದ ಆತ್ಮೀಯ ಫೈಸಲ್ ಫರೂಖಿ ಟ್ವೀಟ್ ಮಾಡಿ ತಿಳಿಸಿದ್ದಾರೆ.
ದಿಲೀಪ್ ಕುಮಾರ್ ಆರೋಗ್ಯ ಕ್ಷೀಣಿಸಿದೆ ಎಂದು ಇತ್ತೀಚೆಗೆ ಸುದ್ದಿ ಹರಿದಾಡಿದ್ದ ಹಿನ್ನೆಲೆಯಲ್ಲಿ ಫೈಸಲ್ ಫರೂಖಿ ಇದೆಲ್ಲಾ ವದಂತಿ ಎಂದು ಅಲ್ಲಗಳೆದಿದ್ದರು. 1944ರಲ್ಲಿ ಜ್ವರ್ ಭಟಾ ಸಿನಿಮಾ ಮೂಲಕ ಚಿತ್ರರಂಗಕ್ಕೆ ಅಡಿಯಿಟ್ಟ ದಿಲೀಪ್ ಕುಮಾರ್ ಐದು ದಶಕಗಳ ಸುದೀರ್ಘ ಕಾಲ ವೃತ್ತಿ ಬದುಕಿನಲ್ಲಿ ಮರೆಯಲಾಗದ ಚಿತ್ರಗಳೊಂದಿಗೆ ಅದ್ಭುತ ನಟನೆಯ ಮೂಲಕ ಪ್ರೇಕ್ಷಕರನ್ನು ರಂಜಿಸಿದ್ದಾರೆ.
ಕೋಹಿನೂರ್, ಮೊಘಲ್ ಇ ಆಜಂ, ದೇವದಾಸ್, ನಯಾ ದೌರ್, ರಾಮ್ ಶ್ಯಾಮ್ ಚಿತ್ರಗಳಲ್ಲಿನ ದಿಲೀಪ್ ನಟನೆಗೆ ಪ್ರೇಕ್ಷಕರು ಮಂತ್ರಮುಗ್ಧರಾಗಿದ್ದಾರೆ. ದಿಲೀಪ್ ಕುಮಾರ್ ಕೊನೆಯ ಬಾರಿ 1998ರಲ್ಲಿ ಖಿಲಾ ಸಿನಿಮಾ ಮೂಲಕ ಬೆಳ್ಳಿತೆರೆ ಮೇಲೆ ಕಾಣಿಸಿಕೊಂಡಿದ್ದರು. 1994ರಲ್ಲಿ ದಾದಾ ಸಾಹೇಬ್ ಫಾಲ್ಕೆ ಪ್ರಶಸ್ತಿ, 2015ರಲ್ಲಿ ಪದ್ಮವಿಭೂಷನ್ ಪ್ರಶಸ್ತಿಗೆ ಪಾತ್ರರಾಗಿದ್ದಾರೆ.
