ಕೊಚ್ಚಿ: ಗೋಲ್ಡನ್ ಗ್ಲೋಬ್ ರೇಸ್ ವೇಳೆ ಹಿಂದು ಮಹಾಸಾಗರದಲ್ಲಿ ಚಂಡಮಾರುತಕ್ಕೆ ಸಿಲುಕಿ ನೌಕೆ ಅಪಘಾತಕ್ಕೀಡಾದ ಕಾರಣ ಗಾಯಗೊಂಡಿರುವ ಭಾರತೀಯ ನೌಕಾಪಡೆಯ ಅಧಿಕಾರಿಯನ್ನು ರಕ್ಷಿಸಲು ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ರಕ್ಷಣಾ ಇಲಾಖೆ ತಿಳಿಸಿದೆ.
ಕಮಾಂಡರ್ ಅಭಿಲಾಶ್ ಟಾಮಿ ಅವರಿದ್ದ ‘ತುರಿಯಾ’ ನೌಕೆ ಆಸ್ಟ್ರೇಲಿಯಾದ ಪರ್ತ್ನಿಂದ ಸುಮಾರು 1,900 ನಾಟಿಕಲ್ ಮೈಲಿ ದೂರದಲ್ಲಿ ದಕ್ಷಿಣ ಹಿಂದು ಮಹಾಸಾಗರದಲ್ಲಿ ಅಪಘಾತಕ್ಕೀಡಾಗಿದೆ. ಅಭಿಲಾಶ್ ಅವರ ಬೆನ್ನಿಗೆ ಗಾಯವಾಗಿದೆ ಎಂದು ತಿಳಿದುಬಂದಿದೆ. ಈ ಹಿನ್ನಲೆಯಲ್ಲಿ ಅವರ ರಕ್ಷಣೆಗಾಗಿ ಭಾರತೀಯ ನೌಕಾ ಪಡೆಯ ಐಎನ್ಎಸ್ ಸತ್ಪುರಾ ನೌಕೆ ಸ್ಥಳಕ್ಕೆ ತೆರಳುತ್ತಿದೆ. ಆಸ್ಟ್ರೇಲಿಯಾ ರಕ್ಷಣಾ ಇಲಾಖೆ ಸಹ ಭಾರತೀಯ ನೌಕಾ ಪಡೆಯೊಂದಿಗೆ ರಕ್ಷಣಾ ಕಾರ್ಯಾಚರಣೆಯಲ್ಲಿ ಕೈಜೋಡಿಸಿದೆ.
ಜುಲೈ 1 ರಂದು ಫ್ರಾನ್ಸ್ನಿಂದ ರೇಸ್ ಪ್ರಾರಂಭವಾಗಿತ್ತು. 84 ದಿನಗಳ ಅವಧಿಯಲ್ಲಿ ಅಭಿಲಾಶ್ ಅವರು ಸುಮಾರು 10,500 ನಾಟಿಕಲ್ ಮೈಲು ದೂರವನ್ನು ಕ್ರಮಿಸುವ ಮೂಲಕ ರೇಸ್ನಲ್ಲಿ ಮೂರನೇ ಸ್ಥಾನವನ್ನು ಕಾಪಾಡಿಕೊಂಡಿದ್ದರು. ಆದರೆ, ಹಿಂದು ಮಹಾಸಾಗರದಲ್ಲಿ ಎದ್ದ ಭೀಕರ ಚಂಡಮಾರುತದಿಂದಾಗಿ ಸುಮಾರು 130 ಕಿ.ಮೀ. ವೇಗದಲ್ಲಿ ಗಾಳಿ ಬೀಸುತ್ತಿದ್ದು, 10 ಮೀಟರ್ಗಿಂತ ಹೆಚ್ಚು ಎತ್ತರದ ಅಲೆಗಳು ಏಳುತ್ತಿವೆ. ಚಂಡಮಾರುತದ ಹೊಡೆತಕ್ಕೆ ಸಿಲುಕಿ ಅಭಿಲಾಶ್ ಅವರಿದ್ದ ನೌಕೆ, ಎರಡನೇ ಸ್ಥಾನದಲ್ಲಿದ್ದ ಡೆನ್ಮಾರ್ಕ್ನ ಮಾರ್ಕ್ ಸ್ಲಾಟ್ ಮತ್ತು ಐರ್ಲೆಂಡ್ನ ಗ್ರೆಗರ್ ಮೆಕ್ಗುಕಿನ್ ಅವರ ನೌಕೆ ಅಪಘಾತಕ್ಕೀಡಾಗಿವೆ. ಮೆಕ್ಗುಕಿನ್ ಮತ್ತು ಸ್ಲಾಟ್ ಸುರಕ್ಷಿತವಾಗಿದ್ದು, ಅಭಿಲಾಶ್ ಗಾಯಗೊಂಡಿದ್ದಾರೆ ಎಂದು ತಿಳಿದುಬಂದಿದೆ.
ಅಭಿಲಾಶ್ ಅವರು 2013ರಲ್ಲಿ ಏಕಾಂಗಿಯಾಗಿ ವಿಶ್ವ ಪರ್ಯಟನೆ ಮಾಡಿ ಬಂದಿದ್ದರು. ಈಗ ಸುಮಾರು 30 ಸಾವಿರ ನಾಟಿಕಲ್ ಮೈಲು ದೂರ ಕ್ರಮಿಸುವ ಗೋಲ್ಡನ್ ಗ್ಲೋಬ್ ರೇಸ್ನಲ್ಲಿ ಪಾಲ್ಗೊಂಡಿರುವ ಏಕೈಕ ಭಾರತೀಯ ಸ್ಪರ್ಧಿಯಾಗಿದ್ದಾರೆ.
