ಬೆಂಗಳೂರು, ಆ.31- ಮುಖ್ಯಮಂತ್ರಿ ಕುಮಾರಸ್ವಾಮಿ ತಮ್ಮ ಪುತ್ರ ನಿಖಿಲ್ ಗೌಡನಿಗೆ ಆಂಧ್ರ ಪ್ರದೇಶದಲ್ಲಿ ಹುಡುಗಿ ಹುಡುಕುತ್ತಿದ್ದು, ಮದುವೆಯ ಮಾತುಕತೆ ನಡೆಸುವ ಸಲುವಾಗಿ ಇಂದು ವಿಜಯವಾಡಕ್ಕೆ ತೆರಳಿದ್ದಾರೆ.
ಪತ್ನಿ ಅನಿತಾರ ಜೊತೆ ಕುಮಾರಸ್ವಾಮಿ ಇಂದು ಆಂದ್ರ ಪ್ರದೇಶ ಪ್ರವಾಸ ಕೈಗೊಂಡಿದ್ದು, ವಿಜಯವಾಡ ಉದ್ಯಮಿ ಪ್ರಾಫಿಟ್ ಶೂ ಕಂಪೆನಿ ಮಾಲೀಕ ಕೋಟೇಶ್ವರ ರಾವ್ ಅವರ ಮಗಳು ಸಹಜ ಜತೆ ನಿಕಿಲ್ ವಿವಾಹ ನಡೆಸಲು ಮಾತುಕತೆ ನಡೆಸಿದ್ದಾರೆ. ದೆಹಲಿ ಪ್ರವಾಸದಲ್ಲಿರುವ ಕುಮಾರಸ್ವಾನಿ ಇಂದು ಬೆಳಿಗ್ಗೆ ಅಲ್ಲಿಂದ ನೇರವಾಗಿ ವಿಜಯವಾಡಕ್ಕೆ ತೆರೆಳಿದ್ದಾರೆ. ಅನಿತಾ ಕುಮಾರಸ್ವಾಮಿ ಅವರು ಬೆಂಗಳೂರಿನಿಂದ ವಿಜಯವಾಡಕ್ಕೆ ತೆರಳಿದ್ದಾರೆ. ಅಲ್ಲಿನ ದುರ್ಗಾದೇವಿ ದೇವಾಲಯಕ್ಕೆ ತೆರಳಿ ಪೂಜೆ ನಡೆಸಿದ ದಂಪತಿ ನಂತರ ಆಂಧ್ರಪ್ರದೇಶದ ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಅವರನ್ನು ಭೇಟಿ ಮಾಡಿದ್ದಾರೆ. ಕೋಟೆಶ್ವರ್ ರಾವ್ ಮತ್ತು ಕುಮಾರ ಸ್ವಾಮಿ ಕುಟುಂಬದ ನಡುವೆ ಸಂಬಂಧ ಬೆಸೆಯಲು ಚಂದ್ರಬಾಬು ನಾಯ್ಡು ಪ್ರಮುಖ ಕಾರಣಕರ್ತರಾಗಿದ್ದಾರೆ. ಹಾಗಾಗಿ ಚಂದ್ರ ಬಾಬು ನಾಯ್ಡು ಜೊತೆ ಚರ್ಚೆ ನಡೆಸಿ ನಂತರ ಮದುವೆಯ ಮಾತುಕತೆ ಮುಂದುವರೆಸಲಿದ್ದಾರೆ ಎಂದು ಹೇಳಲಾಗಿದೆ.
ಈ ಹಿಂದೆ ಕುಮಾರಸ್ವಾಮಿ-ಚಂದ್ರಬಾಬು ನಾಯ್ಡು ಪರಸ್ಪರ ಭೇಟಿಯಾಗಿದ್ದಾಗ ಈ ಸಂಬಂಧದ ಕುರಿತು ಚರ್ಚೆಯಾಗಿತ್ತು. ಎಲ್ಲವೂ ಪ್ರಾಥಮಿಕ ಹಂತದ ಮಾತುಕತೆಗಳಾಗಿದ್ದು, ಇನ್ನೂ ಅಧಿಕೃತವಾಗಿ ಬಹಿರಂಗವಾಗಿಲ್ಲ. ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರು ಸಹಮತ ವ್ಯಕ್ತ ಪಡಿಸಿದ ನಂತರ ಅಧಿಕೃತ ಘೋಷಣೆ ಹೊರ ಬಿಳಲಿದೆ ಎಂದು ಹೇಳಲಾಗುತ್ತಿದೆ. ನಿಖಿಲ್ ಈಗಾಗಲೇ ಚಿತ್ರ ರಂಗಕ್ಕೆ ಎಂಟ್ರಿ ಕೊಟ್ಟಿದ್ದು, ಅವರು ಅಭಿನಯಿಸಿದ ಮೊದಲನೇ ಸಿನಿಮಾ ಜಾಗ್ವರ್ ಕನ್ನಡ ಹಾಗೂ ತೆಲುಗಿನಲ್ಲಿ ತೆರೆ ಕಂಡಿತ್ತು.
