ಚೆನ್ನೈ: ಭಾರಿ ಮಳೆಯಿಂದ ಕೇರಳದಲ್ಲಿ ಭಾರಿ ಅನಾಹುತಕ್ಕೆ ತಮಿಳುನಾಡು ಮುಲ್ಲಪೆರಿಯಾರ್ ಜಲಾಶಯದಿಂದ ದಿಢೀರ್ ನೀರು ಹರಿಸಿದ್ದು ಕಾರಣ ಎಂದು ಸುಪ್ರೀಂಕೋರ್ಟ್ನಲ್ಲಿ ಕೇರಳ ಆರೋಪಿಸಿದೆ. ಇದಕ್ಕೆ ಪ್ರತ್ಯುತ್ತರ ನೀಡಿರುವ ತಮಿಳುನಾಡು ಸರ್ಕಾರ, ಕೇರಳ ಮಾಡಿರುವ ಆರೋಪ ನಿರಾಧಾರ ಹಾಗೂ ತಪ್ಪು ಮಾಹಿತಿ ಎಂದು ಕಿಡಿಕಾರಿದೆ.
ಈ ಬಗ್ಗೆ ಮಾತನಾಡಿರುವ ತಮಿಳುನಾಡು ಸಿಎಂ ಪಳನಿಸ್ವಾಮಿ, ಕೇರಳ ಆರೋಪಕ್ಕೆ ಪ್ರತಿಯಾಗಿ ಹೊಸ ವಾದ ಮಂಡಿಸಿದ್ದಾರೆ. ಡ್ಯಾಮ್ನಿಂದ ನೀರು ಬಿಡುಗಡೆಯಾದರೆ ಒಂದು ಭಾಗದಲ್ಲಿ ಮಾತ್ರ ಪರಿಣಾಮ ಬೀರಬೇಕು. ಅದು ಹೇಗೆ ಕೇರಳದ ಎಲ್ಲ ಜಿಲ್ಲೆಗಳ ಮೇಲೆ ಹಾನಿಯಾಗುವಂತೆ ಮಾಡುತ್ತದೆ ಎಂದು ಪ್ರಶ್ನಿಸಿದ್ದಾರೆ. ಅಷ್ಟೇ ಅಲ್ಲ 80 ಡ್ಯಾಮ್ಗಳಿಂದ ನೀರು ಬಿಡುಗಡೆ ಮಾಡಿದ್ದೇ ಪ್ರವಾಹಕ್ಕೆ ಕಾರಣ ಎಂದು ಹೇಳಿದ್ದಾರೆ.
ಇದೇ ವೇಳೆ, ಮುಲ್ಲಪರಿಯಾರ್ ಅಣೆಕಟ್ಟೆಯಿಂದ ನೀರು ಬಿಡುವ ಮೊದಲು ಮೂರು ಬಾರಿ ಎಚ್ಚರಿಕೆ ನೋಟಿಸ್ ನೀಡಲಾಗಿದೆ. 139, 141 ಹಾಗೂ 142 ಅಡಿ ನೀರು ಸಂಗ್ರಹವಾದಾಗೊಮ್ಮೆ ಎಚ್ಚರಿಕೆ ನೋಟಿಸ್ ನೀಡಿದ್ದೇವೆ ಎಂದು ತಮಿಳುನಾಡು ಸಿಎಂ ಪಳನಿಸ್ವಾಮಿ ಹೇಳಿದ್ದಾರೆ.
ಮುಲ್ಲಪೆರಿಯಾರ್ ಜಲಾಶಯದಿಂದ ನೀರು ಬಿಡುಗಡೆ ನಿಯಂತ್ರಿಸುವಂತೆ ಮನವಿ ಮಾಡಲಾಗಿತ್ತಾದರೂ ತಮಿಳುನಾಡು ಸರ್ಕಾರ ಅದನ್ನು ಕಡೆಗಣಿಸಿದ್ದರಿಂದ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಿತು ಎಂದು ಕೇರಳ ಸರ್ಕಾರ ಸುಪ್ರೀಂಕೋರ್ಟ್ನಲ್ಲಿ ವಾದ ಮಂಡಿಸಿತ್ತು. ಈ ವಿಚಾರವೀಗ ಎರಡೂ ರಾಜ್ಯಗಳ ನಡುವಣ ವಾಗ್ಯುದ್ಧಕ್ಕೆ ಕಾರಣವಾಗಿದೆ.
