ಹೊಸದಿಲ್ಲಿ: ಮಾಹಿತಿ ತಂತ್ರಜ್ಞಾನ ಕಾಯ್ದೆಯ (ಐಟಿ ಆಕ್ಟ್‌) ನಿಯಮಗಳಂತೆ ಟ್ರಾಫಿಕ್ ಪೊಲೀಸರು ಮತ್ತು ರಾಜ್ಯ ಸರಕಾರಗಳು ವಾಹನ ಸವಾರರಿಂದ ಡ್ರೈವಿಂಗ್ ಲೈಸೆನ್ಸ್‌, ನೋಂದಣಿ ಪತ್ರ (ಆರ್‌ಸಿ) ಮತ್ತು ಇನ್ಶೂರೆನ್ಸ್‌ ದಾಖಲೆ ಪತ್ರಗಳ ಮೂಲ ದಾಖಲೆಯೇ (ಒರಿಜಿನಲ್- ಹಾರ್ಡ್‌ ಕಾಪಿ) ಪರಿಶೀಲನೆಗೆ ಬೇಕೆಂದು ಕೇಳುವಂತಿಲ್ಲ ಎಂದು ರಸ್ತೆ ಸಾರಿಗೆ ಸಚಿವಾಲಯ ಸೂಚಿಸಿದೆ.
ಸರಕಾರದ ಡಿಜಿಲಾಕರ್ ಅಥವಾ ಎಂಪರಿವಹನ್ ಆ್ಯಪ್‌ಗಳ ಮೂಲಕ ದೃಢೀಕರಿಸಲಾದ ‘ಎಲೆಕ್ಟ್ರಾನಿಕ್ ಸ್ವರೂಪದ’ ದಾಖಲೆಗಳನ್ನು ಅಧಿಕೃತವೆಂದೇ ಪರಿಗಣಿಸತಕ್ಕದ್ದು. ಸಂಚಾರ ನಿಯಮಗಳ ಉಲ್ಲಂಘನೆ ಸಂದರ್ಭದಲ್ಲಿ ಪೊಲೀಸರು ತಮ್ಮ ಕೈಲಿರುವ ಎಲೆಕ್ಟ್ರಾನಿಕ್ ಸಾಧನ ಅಥವಾ ಮೊಬೈಲ್ ಫೋನ್ ಮೂಲಕವೇ ಚಾಲಕರು ಮತ್ತು ವಾಹನಗಳ ಎಲೆಕ್ಟ್ರಾನಿಕ್ ದಾಖಲೆಗಳ ಕ್ಯೂಆರ್‌ ಕೋಡ್‌ ಸ್ಕ್ಯಾನ್ ಮಾಡಿ ಕೇಂದ್ರೀಕೃತ ಡೇಟಾಬೇಸ್‌ಗೆ ಲಾಗಿನ್ ಆಗಬಹುದು. ಹೀಗಾಗಿ ಮೂಲ ದಾಖಲೆಗಳನ್ನು ವಶಪಡಿಸಿಕೊಳ್ಳಬೇಕಿಲ್ಲ ಎಂದು ಕೇಂದ್ರದ ಸುತ್ತೋಲೆ ಸ್ಪಷ್ಟಪಡಿಸಿದೆ.
ಮಿತಿ ಮೀರಿದ ವೇಗ, ಸಿಗ್ನಲ್‌ ಜಂಪ್‌ ಅಥವಾ ಚಾಲನೆ ವೇಳೆ ಫೋನ್ ಬಳಕೆಯಂತಹ ಹಲವು ಪ್ರಕರಣಗಳಲ್ಲಿ ಸಂಚಾರ ಪೊಲೀಸರು ಚಾಲಕರು ಮತ್ತು ವಾಹನಗಳ ಮೂಲ ದಾಖಲೆಗಳನ್ನೇ ಮುಟ್ಟುಗೋಲು ಹಾಕಿಕೊಂಡು ನಂತರ ಕಳೆದುಹಾಕಿದ ಸಾಕಷ್ಟು ನಿದರ್ಶನಗಳಿವೆ.
ಮೂಲ ದಾಖಲೆಗಳನ್ನು ಪೊಲೀಸರು ಮುಟ್ಟುಗೋಲು ಹಾಕಿಕೊಂಡರೆ ನಂತರ ಸಾರಿಗೆ ಇಲಾಖೆಗಳು ಅವುಗಳನ್ನು ಪತ್ತೆ ಮಾಡುವುದು ಕಷ್ಟವಾಗಿತ್ತದೆ. ಇಂತಹ ಸನ್ನಿವೇಶಗಳಲ್ಲಿ ಜನರು ಹೊಸ ದಾಖಲೆಗಳನ್ನು ಪಡೆಯುವುದೂ ದುಸ್ತರವಾಗುತ್ತದೆ.
‘ಚಾಲಕರ ನಿಯಮ ಉಲ್ಲಂಘನೆಗಳು ವಾಹನ್‌ ಮತ್ತು ಸಾರಥಿ ಡೇಟಾಬೇಸ್‌ಗಳಲ್ಲಿ ಇ-ಚಲನ್ ವ್ಯವಸ್ಥೆಯ ಮೂಲಕ ದಾಖಲಾಗುತ್ತವೆ. ಹೀಗಾಗಿ ದಾಖಲೆಗಳನ್ನು ಭೌತಿಕವಾಗಿ ಸ್ವಾಧೀನಪಡಿಸಿಕೊಳ್ಳುವ ಅಗತ್ಯವಿಲ್ಲ’ ಎಂದು ಸಾರಿಗೆ ಸಚಿವಾಲಯದ ಪತ್ರ ತಿಳಿಸಿದೆ.
‘ಡಿಜಿಲಾಕರ್ ಅಥವಾ ಎಂಪರಿವಹನ್ ಡೇಟಾಬೇಸ್‌ಗಳಲ್ಲಿ ಎಲೆಕ್ಟ್ರಾನಿಕ್ ದಾಖಲೆಗಳು ಲಭ್ಯವಿದ್ದು, ಅವುಗಳನ್ನು ಐಟಿ ಕಾಯ್ದೆ-2000 ಅನ್ವಯ ಮೂಲ ದಾಖಲೆಯಂತೆಯೇ ಎಲೆಕ್ಟರಾನಿಕ್ ದಾಖಲೆಗಳನ್ನೂ ಜೋಡಿಸಲಾಗಿದೆ. ಹೀಗಾಗಿ ಅವುಗಳನ್ನು ಒರಿಜಿನಲ್ ಎಂದೇ ಪರಿಗಣಿಸಬೇಕು. ಮೋಟಾರ್ ವಾಹನಗಳ ಕಾಯ್ದೆ 1988ರ ಅಡಿಯಲ್ಲಿ ಎಲೆಕ್ಟ್ರಾನಿಕ್ ನಮೂನೆಯ ದಾಖಲೆಗಳನ್ನು ಸಾರಿಗೆ ಪ್ರಾಧಿಕಾರಗಳು ವಿತರಿಸಿದ ಮೂಲ ದಾಖಲೆಗೆ ಸಮನಾಗಿ ಪರಿಗಣಿಸತಕ್ಕದ್ದು’ ಎಂದು ಕೇಂದ್ರ ಸಚಿವಾಲಯ ಹೇಳಿದೆ.
ಡಿಜಿಲಾಕರ್ ಆಪ್‌ ಎಲ್ಲ ಮೊಬೈಲ್ ಫೋನ್‌ಗಳಿಗೂ ಲಭ್ಯವಿದೆ. ಎಂಪರಿವಹನ್ ಸದ್ಯಕ್ಕೆ ಆಂಡ್ರಾಯ್ಡ್‌ ಫೋನ್‌ಗಳಿಗೆ ಮಾತ್ರ ಲಭ್ಯವಿದೆ. ಆದರೆ 10 ದಿನಗಳೊಳಗೆ ಆಪಲ್‌ ಫೋನ್‌ಗಳಿಗೂ ಲಭ್ಯವಾಗಲಿವೆ.
ಸಂಚಾರ ಪೊಲೀಸರು ಮತ್ತು ಸಾರಿಗೆ ನಿಯಮ ಜಾರಿ ಅಧಿಕಾರಿಗಳು ವಾಹನಗಳು ಮತ್ತು ಚಾಲಕರ ಡಿಜಿಟಲ್‌ ದಾಖಲೆಗಳನ್ನು ಸ್ವೀಕರಿಸುವಂತೆ ಕಡ್ಡಾಯಗೊಳಿಸುವ ಪ್ರಸ್ತಾವ ಕೇಂದ್ರ ಸರಕಾರದ ಮುಂದಿದೆ ಎಂದು ಎಲ್ಲಕ್ಕಿಂತ ಮೊದಲು ಟೈಮ್ಸ್‌ ಆಫ್‌ ಇಂಡಿಯಾ ಜುಲೈ 17ರಂದು ವರದಿ ಮಾಡಿತ್ತು.
