ಪಾಕಿಸ್ತಾನದಲ್ಲಿ ಮಹಿಳಾ ಕಲಾವಿದರ ಮೇಲೆ ನಡೆಯುತ್ತಿರುವ ಹಲ್ಲೆ ಪ್ರಕರಣಗಳು ದಿನೇದಿನೇ ವರದಿಯಾಗುತ್ತಿದ್ದು, ಇದೀಗ ಮತ್ತೊಬ್ಬ ನಟಿ ಮತ್ತು ಗಾಯಕಿ ರೇಷ್ಮಾರ ಗುಂಡಿಕ್ಕಿ ಹತ್ಯೆ ಮಾಡಲಾಗಿದೆ. ಈ ದಾರುಣ ಘಟನೆ ಪಾಕಿಸ್ತಾನದ ಖೈಬರ್ ಫಕ್ತುಂಖ್ವಾದಲ್ಲಿ ನಡೆದಿದ್ದು ರೇಷ್ಮಾ ಪತಿಯೇ ಗುಂಡಿಟ್ಟು ಕೊಂದಿದ್ದಾನೆ ಎಂಬ ಆರೋಪ ಮಾಡಲಾಗಿದೆ.
ಹತ್ಯೆಯಾಗಿರುವ ರೇಷ್ಮಾ ಹಲವು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಗಾಯಕಿಯಾಗಿಯೂ ಅವರು ಹೆಸರು ಮಾಡಿದ್ದಾರೆ. ಪತಿಯ ಜತೆಗೆ ಭಿನ್ನಾಭಿಪ್ರಾಯದ ಕಾರಣ ಅವರು ಕಳೆದ ಕೆಲ ದಿನಗಳಿಂದ ನೌಷೆರಾ ಕಲಾನ್‌ನಲ್ಲಿನ ಹಕಿಮಾಬಾದ್‌ನಲ್ಲಿ ತನ್ನ ಸಹೋದರನ ಮನೆಯಲ್ಲಿದ್ದರು.
“ರೇಷ್ಮಾ ಪತಿ ಮನಸೋಇಚ್ಛೆ ಗುಂಡು ಹಾರಿಸಿ ಕೊಂದಿದ್ದು, ಗುಂಡಿನ ದಾಳಿಗೆ ರೇಷ್ಮಾ ಸ್ಥಳದಲ್ಲೇ ಕುಸಿದುಬಿದ್ದಿದ್ದಾರೆ. ಬಳಿಕ ತೀವ್ರ ರಸ್ತಸ್ರಾವದಿಂದ ಮೃತಪಟ್ಟಿದ್ದಾರೆ. ಅಷ್ಟರಲ್ಲಿ ಪತಿ ಅಲ್ಲಿಂದ ಪರಾರಿಯಾಗಿದ್ದಾನೆ” ಎಂದು ಸ್ಥಳೀಯ ಸುದ್ದಿ ವಾಹಿನಿ ವರದಿ ಮಾಡಿದೆ.
ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ವಿಚಾರಣೆ ನಡೆಸಿದ್ದಾರೆ. ರೇಷ್ಮಾ ನಾಲ್ಕನೇ ಪತ್ನಿಯಾಗಿದ್ದು ಇಬ್ಬರ ನಡುವೆ ಭಿನ್ನಾಭಿಪ್ರಾಯಗಳಿದ್ದವು ಎಂದಿದ್ದಾರೆ ತನಿಖೆ ನಡೆಸುತ್ತಿರುವ ಪೊಲೀಸರು. ರೇಷ್ಮಾ ಪ್ರಕರಣವೂ ಸೇರಿದರೆ ಈ ವರ್ಷ ಪಾಕಿಸ್ತಾನದಲ್ಲಿ ಮಹಿಳಾ ಕಲಾವಿದರ ಮೇಲೆ ಒಟ್ಟು 15 ಹಲ್ಲೆ ಪ್ರಕರಣ ದಾಖಲಾಗಿವೆ. ಇದೇ ವರ್ಷ ಫೆಬ್ರವರಿ 3ರಂದು ಕಲಾವಿದೆ ಸನ್‍ಬುಲ್ ಖಾಸಗಿ ಸಮಾರಂಭವೊಂದಲ್ಲಿ ಹತ್ಯೆಯಾಗಿದ್ದರು.
