ಹುಬ್ಬಳ್ಳಿ – ಚಾಮಯ್ಯ ಮೇಸ್ಟ್ರು ನೆಚ್ಚಿನ ಶಿಷ್ಯ ರಾಮಚಾರಿಯಾಗಿ, ನಾಯಕ ನಟನಾಗಿ ನಟಿಸಿದ ಸಾಹಸ ಸಿಂಹ ವಿಷ್ಣುವರ್ಧನ್ ಅವರ ಮೊದಲ ಚಿತ್ರ “ನಾಗರಹಾವು” ಇಂದು ಮತ್ತೆ ಬಿಡುಗಡೆಯಾಗಿದೆ. 70 ರ ದಶಕದಲ್ಲಿ ತೆರೆಕಂಡ ಕಪ್ಪು ಬಿಳುಪು ಚಿತ್ರ, ಇಂದು ರಿಮೇಕ್ ಆಗಿ ಬಣ್ಣದ ಚಿತ್ರ ತೆರೆ ಮೇಲೆ ಬಂದಿದೆ. ಚಿತ್ರಕ್ಕೆ ಹುಬ್ಬಳ್ಳಿಯಲ್ಲಿ ಭರ್ಜರಿ ರೆಸ್ಪಾನ್ಸ್ ದೊರೆತಿದೆ. ಈ ಹಿನ್ನೆಲೆ ಇಂದು ಹುಬ್ಬಳ್ಳಿಯ ರೂಪಂ ಚಿತ್ರ‌ಮಂದಿರಲ್ಲಿ ಸಂಭ್ರಮ ಮನೆ ಮಾಡಿತ್ತು. ಡಾ. ವಿಷ್ಣು ಸೇನಾ ಅಭಿಮಾನಿ ಬಳಗದಿಂದ ಚಿತ್ರಕ್ಕೆ ಅದ್ದೂರಿ ಸ್ವಾಗತ ಕೋರಲಾಯಿತು. ದಿವಂಗತ ವಿಷ್ಣು ಕಟೌಟ್ ಗೆ ಬೃಹತ್ ಹೂವಿನ ಮಾಲೆ ಹಾಕಿದ ಅಭಿಮಾನಿಗಳು, ಕಟೌಟ್ ಗೆ ಹಾಲಿನ ಅಭಿಷೇಕ ಮಾಡಿದರು. ಕೇಕ್ ಕತ್ತರಿಸಿ, ಪಟಾಕಿ ಸಿಡಿಸಿ ಸಂಭ್ರಮಿಸಿದರು. ದಿ. ಡಾ. ವಿಷ್ಣುವರ್ಧನ ಅವರಿಗೆ ಜಯಘೋಷ ಕೂಗಿ ಅಭಿಮಾನ ಮೆರೆದರು.
