ನವದೆಹಲಿ:ಜೂ-25: ಅಸಂಪ್ಷನ್‌ ದ್ವೀಪದಲ್ಲಿ ಜಂಟಿಯಾಗಿ ನೌಕಾನೆಲೆ ಅಭಿವೃದ್ಧಿಪಡಿಸುವ ಒಪ್ಪಂದಕ್ಕೆ ಭಾರತ ಮತ್ತು ಸೀಶೆಲ್ಸ್‌ ಸಹಿ ಹಾಕಿವೆ. ಪ್ರಧಾನಿ ನರೇಂದ್ರ ಮೋದಿ ಮತ್ತು ಅಧ್ಯಕ್ಷ ಡ್ಯಾನಿ ಫೌರೆ ಈ ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ.
‘ಪರಸ್ಪರರ ಹಕ್ಕುಗಳನ್ನು ಆಧರಿಸಿ ಅಸಂಪ್ಷನ್‌ ಐಲ್ಯಾಂಡ್ ಯೋಜನೆ ಮುಂದುವರಿಸಲು ನಾವು ಒಪ್ಪಿಕೊಂಡಿದ್ದೇವೆ’ ಎಂದು ಪ್ರಧಾನಿ ಮೋದಿ ತಿಳಿಸಿದ್ದಾರೆ. ಭಾರತಕ್ಕೆ ಭೇಟಿ ನೀಡಿರುವ ಸೀಸೆಲ್ಸ್‌ ಅಧ್ಯಕ್ಷರ ಜತೆ ಸಮಾಲೋಚನೆ ನಡೆಸಿದ ಬಳಿಕ ಅವರು ಈ ವಿಷಯ ಪ್ರಕಟಿಸಿದರು.
ಈ ಯೋಜನೆಯಿಂದ ಹಿಂದೂ ಮಹಾಸಾಗರ ವಲಯದಲ್ಲಿ ವ್ಯೂಹಾತ್ಮಕವಾಗಿ ಭಾರತಕ್ಕೆ ಹೆಚ್ಚಿನ ಅನುಕೂಲವಾಗಲಿದೆ.
‘ಭಾರತ ಮತ್ತು ಸೀಶೆಲ್ಸ್‌ ವ್ಯೂಹಾತ್ಮಕವಾಗಿ ಪ್ರಮುಖ ಪಾಲುದಾರರು. ಪ್ರಜಾಪ್ರಭುತ್ವದ ಮೌಲ್ಯಗಳು ಹಾಗೂ ಭೌಗೋಳಿಕವಾಗಿ ಹಿಂದೂ ಮಹಾಸಾಗರದಲ್ಲಿ ಶಾಂತಿ, ಭದ್ರತೆ ಮತ್ತು ಸ್ಥಿರತೆ ಕಾಪಾಡುವ ಮೂಲ ಉದ್ದೇಶಗಳನ್ನು ನಾವು ಗೌರವಿಸುತ್ತೇವೆ’ ಎಂದು ಮೋದಿ ತಿಳಿಸಿದರು.
ಈ ವೇಳೆ ಮಾತನಾಡಿದ ಸೀಶೆಲ್ಸ್‌ ಅಧ್ಯಕ್ಷ ಫೌರೆ, ಅಸಂಪ್ಷನ್‌ ಐಲ್ಯಾಂಡ್ ವಿಷಯವನ್ನು ಚರ್ಚಿಸಲಾಯಿತು. ನಾವು ಪರಸ್ಪರ ಹಿತಾಸಕ್ತಿಗಳನ್ನು ರಕ್ಷಿಸಲು ಈ ಯೋಜನೆ ಮುಂದುವರಿಸಲು ಒಪ್ಪಿಕೊಂಡಿದ್ದೇವೆ ಎಂದು ಹೇಳಿದರು.
ಪ್ರಧಾನಿ ಮೋದಿ ಅವರು ದೂರದೃಷ್ಟಿಯುಳ್ಳ ಒಬ್ಬ ಮಹಾನ್‌ ನಾಯಕರಾಗಿದ್ದು, ಅವರ ನಾಯಕತ್ವದಲ್ಲಿ ಈ ವಲಯ ಸುಭದ್ರ ಹಾಗೂ ಶಾಂತಿಯುತವಾಗಿ ಮುಂದುವರಿಯಲಿದೆ. ಬಹುಪಕ್ಷೀಯ ವ್ಯಾಪಾರ, ಶಾಂತಿ ಮತ್ತು ಸುಭದ್ರತೆ ವಿಚಾರದಲ್ಲಿ ಅವರ ದೂರದೃಷ್ಟಿ ನಿಜಕ್ಕೂ ಅದ್ಭುತ ಎಂದು ಶ್ಲಾಘಿಸಿದರು.
ಸೀಶೆಲ್ಸ್‌ನ ರಕ್ಷಣಾ ವಲಯಕ್ಕೆ 10 ಕೋಟಿ ಡಾಲರ್‌ಗಳ ಸಾಲದ ನೆರವನ್ನೂ ಪ್ರಧಾನಿ ಮೋದಿ ಈ ಸಂದರ್ಭದಲ್ಲಿ ಪ್ರಕಟಿಸಿದರು. ಎರಡೂ ದೇಶಗಳು ಒಟ್ಟು ಆರು ಒಪ್ಪಂದಗಳಿಗೆ ಸಹಿ ಹಾಕಿವೆ.
India and Seychelles agreed,work together on a project to develop a naval base,Assumption Island
