ಹೊಸದಿಲ್ಲಿ: ಪರಿಸರ ರಕ್ಷಣೆಗಾಗಿ ವಿಶ್ವಾದ್ಯಂತ ಅರಿವು ಮತ್ತು ಕಾರ್ಯಕ್ರಮವನ್ನು ಪ್ರೋತ್ಸಾಹಿಸಲು ವಾರ್ಷಿಕವಾಗಿ ಜೂನ್ 5 ರಂದು ಆಚರಿಸಲಾಗುತ್ತದೆ. ನಾಳೆ ಆಚರಿಸಲ್ಪಡುತ್ತಿರುವ ವಿಶ್ವ ಪರಿಸರ ದಿನ 2018 ಕ್ಕೆ ಭಾರತವು ಜಾಗತಿಕ ಆತಿಥ್ಯ ವಹಿಸಲಿದೆ.
ಈ ವಿಶೇಷ ಸಂದರ್ಭದಲ್ಲಿ ರಾಷ್ಟ್ರ ರಾಜಧಾನಿಯಲ್ಲಿರುವ ಇಂದಿರಾ ಗಾಂಧಿ ವಿಮಾನ ನಿಲ್ದಾಣ ಹಸಿರುಮಯವಾಗಿ ಕಂಗೊಳಿಸುತ್ತ ಗಮನ ಸೆಳೆಯುತ್ತಿದೆ. ವಾಯುಮಾಲಿನ್ಯವನ್ನು ಎದುರಿಸಲು ಗಾಳಿ ಶುದ್ಧೀಕರಣ ಸಾಧನಗಳನ್ನು ಬಳಸುವ ಬದಲು ಒಳಾಂಗಣದಲ್ಲಿ ಅಂದಾಜು 35,000 ಗಿಡಗಳನ್ನು ನೆಟ್ಟು, ನೈಸರ್ಗಿಕ ಶುದ್ಧೀಕರಣದ ಮೊರೆ ಹೋಗುವ ಮೂಲಕ ಸುದ್ದಿಯಲ್ಲಿದೆ ಈ ವಿಮಾನ ನಿಲ್ದಾಣ.
ಪ್ರತಿ ವರ್ಷ ಸಾವಿರಾರು ಸಸ್ಯಗಳನ್ನು ನೆಡಲಾಗುತ್ತಿದ್ದು ಮತ್ತು ಈ ಸಂಖ್ಯೆಯನ್ನು ಗಣನೀಯವಾಗಿ ಹೆಚ್ಚಿಸುವ ಉದ್ದೇಶ ನಮಗಿದೆ. ಸುಮಾರು 3.9 ಮಿಲಿಯನ್ ಚದರ ಅಡಿ ಇರುವ ನಿಲ್ದಾಣದ ಹೊರ ಆವರಣ ಸಸ್ಯಗಳು ಮತ್ತು ಪೊದೆಗಳಿಂದ ಸುತ್ತುವರೆದಿದೆ, ಎಂದು ವಿಮಾನ ನಿಲ್ದಾಣದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಗಾಳಿಯ ನೈಸರ್ಗಿಕ ಶುದ್ಧೀಕರಣಕ್ಕಾಗಿ ಭರಪೂರ ಎಲೆಗೊಂಚಲು ಹೊಂದಿರುವ ಮತ್ತು ಹೂಬಿಡುವ ಗಿಡಗಳನ್ನೇ ಬೆಳೆಸಲಾಗುತ್ತದೆ. ಇದರಲ್ಲಿ ಕ್ಯಾಸಿಯ ಫಿಸ್ಟುಲಾ, ಅಸ್ಲೊಟೋನಿಯಾ ಸ್ಕೊಲರಿಸ್, ಸ್ಪೈಡರ್ ಪ್ಲಾಂಟ್ , ಸ್ನೇಕ್ ಪ್ಲಾಂಟ್, ಗೋಲ್ಡನ್ ಪೊಥೋಸ್, ವೀಪಿಂಗ್ ಫಿಗ್, ಜಕರಾಂಡಾ ಮಿಮೋಸಿಫೋಲಿಯಾ, ಬಿದಿರು ಮುಂತಾದ ಒಳಾಂಗಣದಲ್ಲಿ ಬೆಳಸಲು ಅನುಕೂಲವಾಗುವ ಗಿಡಗಳು ಸೇರಿವೆ.
ವಿವಿಧ ಪ್ರಭೇದದ ಗಿಡಗಳನ್ನು ನೆಡಲಾಗಿದ್ದು, ಇವು ಕೇವಲ ವಿಮಾನ ನಿಲ್ದಾಣದ ಸೌಂದರ್ಯ ವರ್ಧನೆ ಮಾಡುವುದಷ್ಟೇ ಅಲ್ಲ ವಾಯು ಶುದ್ಧೀಕರಣಕ್ಕೂ ಅಗಾಧ ಕೊಡುಗೆ ನೀಡುತ್ತವೆ. ಪ್ರತಿ ಪ್ರಭೇದಗಳು ನಿರ್ದಿಷ್ಟ ಪ್ರಯೋಜನ ನೀಡುವಂತಹ ವೈಶಿಷ್ಟ್ಯತೆ ಹೊಂದಿವೆ. ಉದಾಹರಣೆಗೆ ಸಮೃದ್ಧ ಎಲೆಗಳನ್ನು ಹೊಂದಿರುವ ಸ್ಪೈಡರ್ ಸಸ್ಯಗಳು ಫಾರ್ಮಾಲ್ಡಿಹೈಡ್, ಕಾರ್ಬನ್ ಮಾನಾಕ್ಸೈಡ್ ಮತ್ತು ಕ್ಸಿಲೀನ್‌ನಂತಹ ಮಾಲಿನ್ಯಕಾರಕಗಳನ್ನು ಸುಲಭವಾಗಿ ಫಿಲ್ಟರ್ ಮಾಡುತ್ತವೆ.
