ಬೆಂಗಳೂರು,ಏ.21-ಅಂತಾರಾಷ್ಟ್ರೀಯ ಖ್ಯಾತಿಯ ನೃತ್ಯ ಕಲಾವಿದರಾದ ಅನುರಾಧಾ-ಡಾ.ಶ್ರೀಧರ್ ದಂಪತಿಗಳ ಖೇಚರ ಅಕಾಡೆಮಿ ಆಫ್ ಭರತನಾಟ್ಯಂ ನೃತ್ಯಶಾಲೆಯ ಹೆಮ್ಮೆಯ ನೃತ್ಯ ವಿದ್ಯಾರ್ಥಿನಿ ಅನಿಷಾ ಯರ್ಲಾಪಟಿ.
ಈಕೆ ಅತ್ಯಂತ ಪರಿಶ್ರಮ ಮತ್ತು ಬದ್ಧತೆಯಿರುವ, ನೃತ್ಯವೇ ಉಸಿರೆನ್ನುವ ಉತ್ತಮ ನೃತ್ಯಾಕಾಂಕ್ಷಿ. ಡಾ.ಪ್ರಭಾ ಮತ್ತು ರಾಮಕೃಷ್ಣ ದಂಪತಿಗಳ ಪುತ್ರಿಯಾದ ಅನಿಷಾ ಇದೇ ತಿಂಗಳ 29ರಂದು ಸಂಜೆ 6 ಗಂಟೆಗೆ ಜೆ.ಎಸ್.ಎಸ್ ಸಭಾಂಗಣದಲ್ಲಿ ವಿದ್ಯುಕ್ತವಾಗಿ ರಂಗಪ್ರವೇಶ ಮಾಡಲಿದ್ದಾಳೆ.
ಅನುರಾಧ-ಡಾ.ಶ್ರೀಧರ್ ಅತ್ಯುತ್ತಮ ನೃತ್ಯ ಕಲಾವಿದರು ಮಾತ್ರವಲ್ಲದೆ ನಾಟ್ಯಗುರು, ಸೃಜನಾತ್ಮಕ ನೃತ್ಯ ಸಂಯೋಜಕರು. ಇಂಥವರ ಮಾರ್ಗದರ್ಶನದಲ್ಲಿ ಪ್ರಫುಲ್ಲವಾಗಿ ಅರಳಿರುವ ಅಭಿಜಾತ ಪ್ರತಿಭೆ ಅನಿಷಾ.
ಓದಿನಲ್ಲೂ ಮಹಾ ಜಾಣೆಯಾಗಿರುವ ಅನಿಷಾ, ವಿದ್ಯಾಭ್ಯಾಸದ ಎಲ್ಲ ಹಂತಗಳಲ್ಲೂ ಡಿಸ್ಟಿಂಕ್ಷನ್ ಪಡೆದು ಪೆಸಿಟ್ ವಿದ್ಯಾಸಂಸ್ಥೆಯಿಂದ ಕಂಪ್ಯೂಟರ್ ಇಂಜಿನಿಯರ್ ಆಗಿ ಹೊರಹೊಮ್ಮಿದ್ದು, ಮುಂದೆ ನಾರ್ತ್ ಕೆರೋಲಿನಾದಲ್ಲಿ ತನ್ನ ಸ್ನಾತಕೋತ್ತರ ಪದವಿ ಪಡೆಯುವ ಮಹತ್ವಾಕಾಂಕ್ಷೆ ಹೊಂದಿದ್ದು, ನೃತ್ಯವನ್ನೂ ಎಡೆಬಿಡದೆ ತಪಸ್ಸಿನಂತೆ ಮುಂದುವರಿಸುವ ಉನ್ನತ ಗುರಿ ಹೊಂದಿದ್ದಾಳೆ.
