ನಗರದ ಮೂರು ಕಡೆ ಮೂವರು ಮಹಿಳೆಯರ ಸರ ಅಪಹರಣ

ಬೆಂಗಳೂರು,ಏ.8- ನಗರದ ಮೂರು ಕಡೆ ಮೂವರು ಮಹಿಳೆಯರ ಸರ ಅಪಹರಣ ನಡೆದಿದ್ದು, ಸಾರ್ವಜನಿಕರು ಆತಂಕ ವ್ಯಕ್ತಪಡಿಸಿದ್ದಾರೆ.
ಮಲ್ಲೇಶ್ವರಂ: ನಡೆದು ಹೋಗುತ್ತಿದ್ದ ಮಹಿಳೆಯನ್ನು ಹಿಂಬಾಲಿಸಿ ಬಂದ ಸರಗಳ್ಳ 6 ಗ್ರಾಂ ಸರ ಎಗರಿಸಿ ಪರಾರಿಯಾಗಿದ್ದಾನೆ. ಮಲ್ಲೇಶ್ವರ ದೇವಸ್ಥಾನದ ಬಳಿ ರಾತ್ರಿ 9.30ರಲ್ಲಿ ಸುಧಾ ಎಂಬುವರು ನಡೆದು ಹೋಗುತ್ತಿದ್ದರು.
ಈ ವೇಳೆ ಬೈಕ್‍ನಲ್ಲಿ ಹಿಂಬಾಲಿಸಿಕೊಂಡು ಬಂದ ಸರಗಳ್ಳ ಇವರ ಕೊರಳಲ್ಲಿದ್ದ 6 ಗ್ರಾಂ ಸರ ಎಗರಿಸಿ ಪರಾರಿಯಾಗಿದ್ದಾನೆ.

ವಿಜಯನಗರ: ನಾಗರಬಾವಿ ಮುಖ್ಯರಸ್ತೆಯ ಎಸ್‍ಪಿಜಿ ನಗರದ ಬಳಿ ರಾತ್ರಿ 10 ಗಂಟೆಯಲ್ಲಿ ಗೌರಿ ಎಂಬುವರು ನಡೆದು ಹೋಗುತ್ತಿದ್ದಾಗ ಬೈಕ್‍ನಲ್ಲಿ ಬಂದ ಇಬ್ಬರು ಸರಗಳ್ಳರು 55 ಗ್ರಾಂ ಸರ ಎಗರಿಸಿರುವ ಘಟನೆ ನಡೆದಿದೆ. ಸಹಾಯಕ್ಕಾಗಿ ಕೂಗಿಕೊಂಡರಾದರೂ ಪ್ರಯೋಜನವಾಗಿಲ್ಲ.

ಚಂದ್ರಾಲೇಔಟ್: ಆಟೋದಲ್ಲಿ ಬಂದ ಮಹಿಳೆ ಆಟೋ ಇಳಿದು ಸಮೀಪದಲ್ಲೇ ಇದ್ದ ತಮ್ಮ ಮನೆಗೆ ಹೋಗುತ್ತಿದ್ದಾಗ, ಸರಗಳ್ಳ ಹಿಂಬಾಲಿಸಿ ಬಂದು 25 ಗ್ರಾಂ ಸರ ಎಗರಿಸಿದ್ದಾನೆ.
ಭೆರವೇಶ್ವರ ನಗರದ ನಿವಾಸಿ ಸುಧಾ ಎಂಬುವರು ರಾತ್ರಿ 9.15ರಲ್ಲಿ ಆಟೋದಲ್ಲಿ ಬಂದು ಚಾಲಕನಿಗೆ ಹಣಕೊಟ್ಟು ಇಳಿದು ಹೋಗುತ್ತಿದ್ದಾಗ, ಬೈಕ್‍ನಲ್ಲಿ ಹಿಂದಿನಿಂದ ಬಂದ ಸರಗಳ್ಳ ಸರ ಎಗರಿಸಿ ಪರಾರಿಯಾಗಿದ್ದಾನೆ.

ಸರಗಳ್ಳತನಕ್ಕೆ ಯತ್ನ: ಮತ್ತೊಂದು ಪ್ರಕರಣದಲ್ಲಿ ಸುಬ್ರಹ್ಮಣ್ಯನಗರ ವ್ಯಾಪ್ತಿಯಲ್ಲಿ ರಾತ್ರಿ ಮಹಿಳೆಯೊಬ್ಬರ ಸರ ಎಗರಿಸಲು ಸರಗಳ್ಳರು ಮುಂದಾಗುತ್ತಿದ್ದಂತೆ ಸಹಾಯಕ್ಕಾಗಿ ಚೀರಿಕೊಂಡಾಗ ಸರಗಳ್ಳರು ಪರಾರಿಯಾಗಿದ್ದಾರೆ.
ಆಯಾ ಠಾಣಾ ಪೆÇಲೀಸರು ಪ್ರಕರಣ ದಾಖಲಿಸಿಕೊಂಡು ಸರಗಳ್ಳರ ಬಂಧನಕ್ಕೆ ಬಲೆ ಬೀಸಿದ್ದಾರೆ.