ಬೆಂಗಳೂರು, ಆ.19-ರಾಜ್ಯಸರ್ಕಾರದಿಂದ 2019-20ನೇ ಸಾಲಿನ ಬಿಬಿಎಂಪಿ ಬಜೆಟ್ ತಡೆ ಹಿಡಿದಿರುವ ಹಿನ್ನೆಲೆಯಲ್ಲಿ ವಿಘ್ನ ನಿವಾರಕ ಗಣೇಶಮೂರ್ತಿ ವಿಸರ್ಜನೆಗೂ ವಿಘ್ನ ಎದುರಾಗಿದೆ.
ಗಣೇಶ ಹಬ್ಬ ಹತ್ತಿರವಾಗುತ್ತಿದ್ದರೂ ಗಣೇಶಮೂರ್ತಿ ವಿಸರ್ಜನೆಗೆ ಬಿಬಿಎಂಪಿಯಿಂದ ಟೆಂಡರ್‍ನೀಡಲು ಸಾಧ್ಯವಾಗದ ಸ್ಥಿತಿ ನಿರ್ಮಾಣವಾಗಿದೆ. ಕಳೆದ 10 ದಿನಗಳಿಂದ ಸಮಸ್ಯೆಆಗಿರುವ ಆನ್‍ಲೈನ್ ಟೆಂಡರ್ ವ್ಯವಸ್ಥೆ ಇ-ಪ್ರಾಕ್ಯೂರ್‍ಮೆಂಟ್ ಮೂಲಕ ಟೆಂಡರ್ ಆಹ್ವಾನಿಸಿರುವ ಪಾಲಿಕೆ, ಪ್ರತಿವರ್ಷ ಹಬ್ಬಕ್ಕೆ ಇನ್ನು ಒಂದು ತಿಂಗಳು ಬಾಕಿ ಇರುವಾಗಲೇ ಟೆಂಡರ್‍ಕರೆದು ಪ್ರಕ್ರಿಯೆ ಮುಗಿಸುತ್ತಿತ್ತು.
ಟೆಂಡರ್ ಪಡೆದವರು ಗಣೇಶಮೂರ್ತಿ ವಿಸರ್ಜನೆಗೆ ಅಗತ್ಯ ಸಿದ್ಧತೆಗಳನ್ನು ಮಾಡಿಕೊಳ್ಳುತ್ತಿದ್ದರು. ಆದರೆ ಈ ಬಾರಿ ಟೆಂಡರ್ ಸಿಗದ ಕಾರಣ ಗಣೇಶ ವಿಸರ್ಜನೆಗೆ ತೊಡಕು ಉಂಟಾಗಲಿದೆ.
ಪಾಲಿಕೆ ನೀತಿಗೆ ಸಾರ್ವಜನಿಕರು ಅಸಮಾಧಾನ ವ್ಯಕ್ತಪಡಿಸಿದ್ದು, ಗಣೇಶ ವಿಸರ್ಜನೆಗೆ ಪರ್ಯಾಯ ವ್ಯವಸ್ಥೆ ಕಲ್ಪಿಸಿಕೊಡುವಂತೆ ಒತ್ತಾಯಿಸಿದ್ದಾರೆ.
ಈ ಕುರಿತು ಪಾಲಿಕೆ ಆಯುಕ್ತ ಮಂಜುನಾಥ್ ಪ್ರಸಾದ್‍ಮಾತನಾಡಿ, ಟೆಂಡರ್ ಪ್ರಕ್ರಿಯೆ ಇನ್ನೂ ಅಂತಿಮವಾಗದಿರುವುದು ನಿಜ. ಇ-ಪ್ರಾಕ್ಯೂರ್‍ಮೆಂಟ್‍ನಲ್ಲಿ ತಾಂತ್ರಿಕದೋಷ ಇರುವುದು ನಿಜ. ಕೆಆರ್‍ಐಡಿಎಲ್ ಮೂಲಕ ಟೆಂಡರ್ ನೀಡುವ ಬಗ್ಗೆ ತೀರ್ಮಾನಿಸಲಾಗುವುದು. ನಗರದಲ್ಲಿ ಗಣೇಶ ವಿಸರ್ಜನೆಗೆ ಯಾವುದೇ ತೊಂದರೆಯಾಗದಂತೆ ಎಲ್ಲಾ ಕ್ರಮಗಳನ್ನು ಕೈಗೊಳ್ಳಲಾಗುವುದು ಎಂದು ಭರವಸೆ ನೀಡಿದ್ದಾರೆ.
