ಹುಬ್ಬಳ್ಳಿ, ಮಾ.9- ಕುಟುಂಬ ರಾಜಕಾರಣದ ಕುರಿತು ಮಾತನಾಡುವುದನ್ನು ಕಡಿಮೆ ಮಾಡುವುದೇ ಉತ್ತಮ ಎಂದು ಸಚಿವ ಆರ್.ವಿ.ದೇಶಪಾಂಡೆ ಅಭಿಪ್ರಾಯಪಟ್ಟಿದ್ದಾರೆ.
ಹುಬ್ಬಳ್ಳಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಯಾವುದು ರಾಜಕೀಯ, ಯಾವುದು ಕುಟುಂಬ ರಾಜಕೀಯ ಎಂದು ಹೇಳುವುದೇ ಕಷ್ಟವಾಗಿದೆ. ಹೀಗಿರುವಾಗ ಈ ಕುರಿತು ಮಾತನಾಡದಿರುವುದೇ ಸರಿ ಎಂದರು.
ಸುಮಲತಾ ಅಂಬರೀಶ್ ಅವರ ಕುರಿತು ಸಚಿವ ರೇವಣ್ಣನವರು ಹಾಗೆ ಮಾತನಾಡಬಾರದಿತ್ತು. ರೇವಣ್ಣ ನನ್ನ ಆತ್ಮೀಯ ಸ್ನೇಹಿತರು. ಅವರ ಬಗ್ಗೆ ನನಗೆ ಗೌರವವಿದೆ. ಈ ತರಹದ ವಿಚಾರ ಪ್ರಸ್ತಾಪವಾಗಲೇಬಾರದು ಎಂದು ಹೇಳಿದರು.
ಚುನಾವಣೆಯಲ್ಲಿ ಪರಸ್ಪರ ಅಪವಾದ ಮಾಡುವುದಕ್ಕಿಂತ ನಾವು ಮಾಡಿದ ಒಳ್ಳೆಯ ಕೆಲಸಗಳು, ಅಭಿವೃದ್ಧಿ ಕಾರ್ಯಗಳ ಕುರಿತು ಹೇಳಬೇಕು. ಯಾರೇ ಆಗಲಿ ವ್ಯಕ್ತಿಗತ ಟೀಕೆಯಿಂದ ದೂರವಿರಬೇಕು ಎಂದರು.
